बजेट निर्माणमा अनधिकृत व्यक्तिलाई प्रवेश गराएर निजी कम्पनीहरुलाई फाइदा पुग्ने गरी करको दर हेरफेर गरेको आरोप लागेका अर्थमन्त्री जनार्दन शर्माले दबाब झेल्न नसकेपछि हिजो राजीनामा दिए ।
प्रतिनिधिसभाको बैठकले शर्मामाथि छानविन गर्न ११ सदस्यीय समिति गठन गरेलगत्तै उनले प्रतिनिधिसभाबाटै विशेष समय लिएर बोल्दै राजीनामा दिएका हुन् ।
अर्थमन्त्रीकाे राजीनामापछि नेकपा एमालेका प्रमुख सचेतक विशाल भट्टराईले अब चाहिँ जनार्दन शर्माले एमाले को रहेछ भनेर चिनेको प्रतिक्रिया दिएका छन् ।
उनले हिजो फेसबुकमा एमालेले उठाएको माग पुरा भएको भन्दै लेखेका छन्, ‘अब चाहिँ जनार्दनजीले एमाले को रहेछ भनेर चिन्नुभयो कि ! अझै चिन्न बाँकी रहेको भए छानविन समितिको प्रतिवेदन आएपछि मज्जाले चिन्नुहुनेछ ।’
आर्थिक वर्ष २०७९/८० को बजेट निर्माण गर्दा गत जेठ १४ गते राति अर्थमन्त्रालयमा अनधिकृत व्यक्ति प्रवेश गराएर करको दर हेरफेर गराएको शर्मामाथि आरोप छ ।
यसबारे सबभन्दा पहिले अन्नपूर्णपोस्ट दैनिकले विशेष समाचार लेखेको थियो । समाचार प्रकाशित भएपछि संसदमा एमालेले अर्थमन्त्री शर्माको राजीनामा माग गरेको थियो ।
एमालेले जेठ १४ गते रातिको सीसीटीभी फुटेज हेर्नुपर्ने माग पनि उठाएको थियो । तर शर्माले भने उक्त फुटेज देखाउन नमिल्ने र एमालेले माग्दैमा हेर्न नमिल्ने प्रतिक्रिया दिएका थिए ।
पछि उक्त फुटेज समेत डिलिट गरिएको पत्ता लागेकाे थियाे ।
यसबाट अर्थमन्त्रीले ठूलै चलखेल गरेको बुझिएपछि उनको विरोध चौतर्फी भएको थियो । सत्तारुढ दलकै नेताहरुले समेत विरोध गर्दै राजीनामा दिनुपर्ने बताउन थालेपछि शर्माले राजीनामा दिएका हुन् ।
उनलाई राजीनामा गराउनेबारे हिजै प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहालबीच छलफल समेत भएको थियो ।
