किरात याक्थुङ चुम्लुङका अध्यक्ष प्रेम येक्तेनले वार्ताको बटमलाइन केबलकार खारेजी नै रहेको प्रष्ट पारेका छन् ।
अन्यथा, आन्दोलन पुनः अघि बढ्ने चेतावनी उनले दिएका छन् ।
सरकार र मुक्कुमलुङ (पाथीभरा) आन्दोलनकारीबिच गत माघ २२ गते ६ बुँदे सहमति भएको थियो ।
सहमतिअनुसार सरकारले केबलकार स्टेशन निर्माण कार्य रोक्ने, आन्दोलनकारीले अनिश्चितकालीन बन्द स्थगित गर्ने तथा दोस्रो चरणको वार्ता माघ २७ गते गर्ने सम्झौता भएको थियो ।
अध्यक्ष येक्तेनले सामाजिक सञ्जालमार्फत् २२ गतेको वार्ता केवल संवादको वातावरण निर्माणका लागि मात्र भएको बताएका छन् ।
साथै, उनले माघ २७ गतेको वार्ता मन्त्रीस्तरीय समितिसँग मात्र सम्भव हुने बताएका छन् ।
सरकारले गृहमन्त्रालयका सह-सचिव प्रेमप्रसाद भट्टराईको संयोजकत्वमा वार्ता टोली गठन गरेको थियो ।
माघ २२ गतेको सहमति-पत्रमा सरकारका तर्फबाट सह-सचिव भट्टराई र आन्दोलनकारी तर्फबाट सरस्वती सिंगक (सरु) ले हस्ताक्षर गरेका थिए ।