पत्रकार विद्या चापागाईंले ‘हेर्ने कथा’ नामक आफ्नाे युट्युब च्यानलमा प्रस्तुत गरेपछि सामाजिक सञ्जालमा भाइरल भएका भोजपुरका सेन्मिखा राई अब गायक पनि भएका छन् ।
पहिलोचोटि सेन्मिखाले ‘हिमालै चुली’ बोलको पूर्वेली लोकभाकाको गीत गाएका छन् । शुक्रबार भिडियोसहितको उनको गीत सार्वजनिक गरिएको छ ।
सामाजिक अभियान्ता तथा संगीतकार जीतेन बान्तावा राईले २३ वर्षीय सेन्मिखालाई काठमाडौँमा ल्याएर गीत रेकर्ड गराए ।
गीतको कम्पोज जीतेनले गरे । गीतको रचनाकार भने कृष्णबहादुर राई हुन् ।
सेन्मिखाले भोजपुरमा भेडा चराउँदा वनजंगल तथा डाँडापाखामा गाउँदै आएको लाेकभाकाका गीतलाई काठमाडौँमा रेकर्ड गरिएको हो ।
र, उक्त गीतको भिडियो समेत निर्माण गरी जीतेन बान्तावा राईको युट्युब च्यानलबाट सार्वजनिक गरिएको हो ।
भिडियोको निर्माण अमलादेवी राईले गरेका हुन् भने निर्देशन जीतेन बान्तावा राईले गरेका हुन् ।