जनता समाजवादी पार्टीका वरिष्ठ नेता अशोक राईले डा. बाबुराम भट्टराईलाई प्रतिशतकाे हैन जनताको नेता हुन सुझाव दिएका छन् ।
वीरगन्जमा आयाेजित पार्टीकाे केन्द्रीय समिति बैठकको पहिलो दिन आज वरिष्ठ नेता राईले उक्त कुरा बताएका हुन् ।
उनले आफूहरुले भट्टराईलाई पार्टीकाे शीर्ष नेता बनाएकाे तर उनले भने प्रतिशतको नेता बन्न खोज्नु दुखद् रहेकाे बताए ।
उनले पार्टीभित्र असमझदारी, वादविवाद थिए भने पनि तीन महिनाका लागि स्थगित गरेर निर्वाचनमा परिणाम ल्याउनुपर्ने बेलामा कानुनी रुपमा, विधिको हिसाबले र नैतिक हिसाबले पनि गर्न नमिल्ने सामानान्तर बैठक निन्दनीय रहेको समेत बताए ।
बैठकमा केन्द्रीय कार्यकारिणी समितिका सदस्यहरु राजेन्द्र श्रेष्ठ, गोविन्द चौधरी, मृगेन्द्रकुमार सिंह, मो. इस्तियाक राई, युवराज कार्की, रकम चेम्जोङ, राममसहाय यादव, मो. लालबाबु राउत, शिवलाल थापा, सुशीला श्रेष्ठ र केन्द्रीय सदस्य प्रदीप यादवले आफ्नो धारणा राखेका थिए ।
जसपाका केन्द्रीय सदस्य पूर्ण बस्नेतका अनुसार बैठकमा स्थानीय तहको निर्वाचन सम्बन्धी समीक्षा, संसदीय बोर्ड गठन, निर्वाचन तयारी अभियान समिति गठन, केन्द्रीय समिति/केन्द्रीय कार्यकारिणी समिति पुनर्गठन, चुनावी तालमेल, विधान संशोधन लगायतका कार्यसूचीमा केही बेरमा छलफल हुने बताए ।
