समाजमा धार्मिक तथा साम्प्रदायिक हिंसा मच्चाउन खोज्ने श्रीनिवास आचार्य भनिने दिनेश पण्डितलाई प्रहरीले पक्राउ गरेको छ ।
उनले आफूलाई हिन्दु धर्मकाे गुरु भनेर चिनाउने गरेका छन् ।
प्रहरीले मंगलबार सुनसरीकाे चक्रघट्टीबाट उनलाई पक्राउ गरेकाे हाे ।
उनले केही दिनअघि गौहत्या गर्नेहरुलाई काट्न सार्वजनिक तहमै आव्हान गरेका थिए । गौहत्या गर्ने जो कोहीलाई हत्या गरेर आए त्यसको आफूले जिम्मा लिने उनले बताएका थिए ।
उक्त भिडियाे सामाजिक सञ्जालमा भाइरल भएकाे थियाे ।
उनी यसअघि २०७६ सालमा पनि आफैंलाई गोली हान्न लगाएकाे आरोपमा पक्राउ परेका थिए । त्यसबेला उनलाई पाखुरामा गाेली लागेकाे थियाे ।
तर उक्त कार्य उनी आफैंले गर्न लगाएकाे प्रहरी अनुसन्धानबाट खुलेकाे थियाे ।
उनले हिन्दु धर्मका गुरुमाथि सांघातिक आक्रमण गरिएकाे निहु झिकेर धार्मिक द्वन्द्व निम्त्याउन खाेजेका थिए ।
यसपटक उनले यस्ताे भाषण गरेका थिएः
हिन्दु राष्ट्र र गौहत्याको आन्दोलनमा दश वर्षदेखि लागिरहेको छु । वैदिक सनातन धर्मावलम्बीहरू जिन्दावाद र मुर्दावाद मात्र भनेर हुँदैन, एकजुट हुनुपर्ने भएको छ । हाम्रो गौमातालाई धरानमा काटिरहेका छन्, भोजपुरमा काटिरहेका छन्, झापामा काटिरहेका छन् । हामी केवल घाममा हिँडेर मात्र गौमाता बाँच्ने छैनन् ।
यदि हामी गुरुहरूले नै हतियार उठाउनुपर्याे भने ठिक हुँदैन । हामी अनुरोध गर्छौं, जसले हाम्रो गौमातालाई काट्छ त्यसलाई खुकुरी लिएर गएर काटिदिनुस् । हाम्रो धर्म र शास्त्रले गाई र माई समान रुपले हेर्छ ।