जनता समाजवादी पार्टीका अध्यक्ष अशोक राईले शनिबार धनुषामा अज्ञात समूहले मुस्लिम बस्तीको मस्जिद तोडफोड गरेको घटनाप्रति गम्भीर ध्यानाकर्षण भएको जनाउँदै तत्काल घटनाको छानबिन गरी दोषीलाई कडा कारबाही गर्न सरकारसँग माग गरेका छन्।
उनले आइतबार प्रेस विज्ञप्ति जारी गर्दै धनुषा जिल्लाको कमला नगरपालिका–६ सखुवामरान टोलमा रहेको मुस्लिमहरूको मस्जिद तोडफोड भएको घटनाको घोर निन्दा गर्दै बहुजातीय, बहुसांस्कृतिक समाजमा धार्मिक द्वेष र साम्प्रदायिक तनाव सिर्जना गर्ने यस्ता कार्यमा संलग्न व्यक्तिहरूको पहिचान गरी कडा कारबाही गर्न माग गरेका हुन्।
उनले समस्याको समाधानका लागि घटना क्षेत्रका जनतालाई शान्ति, सद्भाव र संयमता अपनाउन अपिल पनि गरेका छन्।
