‘जातीय विभेद अझै कायम छ, त्यसैले फेरि जातको प्रश्न सिजन–२ लिएर आउँदैछु’

अभिनेता राजेश हमाल टेलिभिजन कार्यक्रम ‘जातको प्रश्न सिजन–२’ लिएर असोज १९ देखि कान्तिपुर टेलिभिजनमा आउने भएका छन् ।

जातको प्रश्न सिजन–२ को ‘प्रोमो’ सामाजिक सञ्जालमा सेयर गर्दै अभिनेता हमालले आफू असोज १९ गतेदेखि हरेक मंगलबार राती ९ बजे कान्तिपुर टेलिभिजनमा जातको प्रश्न लिएर आउने बताए ।

उनले भनेका छन्, ‘जातीय विभेदको कुरा उठ्यो भने विस्तारै हट्दैछ, विस्तारै हट्दै जान्छ भन्ने कुरा हुन्छ । तर विभेद र बहिष्करण आम नेपालीको दैनिक अनुभव हो । समस्या अझै कायम छ । त्यही भएर फेरि पनि जातको प्रश्न सिजन टु लिएर आउँदैछु ।’

जातको प्रश्न सिजन–२ मा अभिनेता हमालका साथमा अभिनेता दयाहाङ राई, गायक प्रकाश सपुत, राष्ट्रिय मानवअधिकार आयोगकी पूर्वसदस्य मोहना अन्सारी र सञ्चारकर्मी निश्मा ढुंगाना पनि सञ्चालकका रुपमा रहने छन् ।

समता फाउन्डेशनले निर्माण गरेको जातको प्रश्नको पहिलो सिजनमा अभिनेता हमाल एक्लैले कार्यक्रम सञ्चालन गरेका थिए ।

पहिलो सिजनमा एपिसोड १२ सम्म कार्यक्रम बनाइएको थियो । सो बखत अभिनेता हमाललाई हिन्दू अतिवादीहरुले क्रिश्चियनहरुको पैसा खाएर हिन्दुविरोधी अभियानमा लागेको आरोप लगाएका थिए ।

हिन्दु समाजमा विद्यमान जातीय विभेद र छुवाछुतको विरुद्धमा बहस गर्ने कार्यक्रममा अभिनेता हमाल सञ्चालक बनेपछि उनले हिन्दू अतिवादीहरुकाे आलोचना खेप्नु परेको थियो ।

कृपया साल्पा अनलाइनको फेसबुक पेज र युट्युब च्यानल सर्च गरी लाइक तथा सब्स्क्राइब गर्नुहोस् ।

Please enter your comment!
Please enter your name here

सम्बन्धित समाचार
spot_img

याे पनि पढ्नुस्