चाम्लिङ भाषा बचाउन अक्षयकोषमा ७५ लाख, एक कराेड पुर्याउने लक्ष्य

किरात राईभित्रको चाम्लिङ भाषा बचाउने प्रयासस्वरुप स्थापना गरिएको सितिमी अक्षयकोषमा हालसम्म ७५ लाख रुपैयाँ जम्मा भएको छ ।

कोषमा कम्तिमा एक करोड रुपैयाँ पुर्याउने लक्ष्य राखिएको छ ।

हाल उक्त कोषमा जम्मा भएको रकमको ब्याजले ‘सितिमी मासिक’ नामक पत्रिका (मेगजिन) निकाल्ने गरिएको छ । जुन चाम्लिङ भाषामा रहेको छ । लिपि भने देवनागरी नै प्रयोग गरिएको छ ।

सितिमी मासिक हातमा लिएका महागायक राजेश पायल राई, साथमा सितिमी मासिक सञ्चालक समितिका अध्यक्ष मनिकुमार राई

सितिमी मासिकका सम्पादक तिलक चाम्लिङले कोषको पैसाको ब्याज, शुभकामना विज्ञापनलगायत अन्य विज्ञापनहरुबापत प्राप्त हुने रकमले पत्रिका चलिरहेको बताए ।

अक्षयकोष विस्तार गर्न तथा नियमित रुपमा पत्रिका प्रकाशन गर्नका लागि मनिकुमार राई अध्यक्ष रहेको नौ सदस्यीय सितिमी मासिक सञ्चालक समिति क्रियाशील छ ।

हाल देश तथा विदेशमा रहेका विभिन्न व्यक्तिहरुबाट थप आर्थिक सहयोग जुटाएर कोष बढाउने प्रयास गरिँदैछ ।

समाजसेवीसमेत रहेका सञ्चालक समितिका अध्यक्ष राईको नेतृत्वमा कोषमा थप सहयोग रकम जुटाउने र पत्रिका चलाउने काम गरिँदै आएको छ ।

सम्पादक चाम्लिङका अनुसार १० हजार रुपैयाँ वा सोभन्दा बढी सहयोग गर्नेहरुलाई सितिमीको आजीवन सदस्य र एक लाख रुपैयाँ वा सोभन्दा बढी सहयोग गर्नेहरुलाई संरक्षकको रुपमा राख्ने गरिएको छ ।

उनकाअनुसार हालसम्म १० हजार रुपैयाँ वा साेभन्दा बढी आर्थिक सहयोग गर्नेहरुकाे संख्या १६५ पुगेकाे छ ।

सहयोग रकम बैंकमा राखिएको छ र सो रकमबाट प्राप्त भएको ब्याजमात्र चलाउने व्यवस्था गरिएको छ ।

हाल विभिन्न जाति तथा समुदायमा बोलिने मातृभाषाहरु लोप हुँदै गए पनि चाम्लिङ राईका केही अगुवाहरुले समुदायको तहबाट पत्रिकालाई माध्यम बनाएर चाम्लिङ भाषा बचाउने प्रयास गरिरहेका छन् ।

ग्रामिण क्षेत्रका मानिसहरुले समेत आफ्नाे मातृभाषा बोल्न छोड्दै गएको बेला यो प्रयास कति प्रभावकारी होला ? हेर्न बाँकी छ ।

सितिमीको सातौं स्थापना दिवस

शुक्रबार ललितपुरको ताल्छिखेलस्थित यलेखिम रेस्टुरेन्टमा सितिमी मासिकको सातौं स्थापना दिवस मनाइएको छ ।

कोरोना महामारीका कारण सीमित व्यक्तिहरुमात्र उपस्थित भएको उक्त कार्यक्रममा चाम्लिङ भाषाविद् बयानसिंह राईलाई ‘सितिमी सम्मान–२०७८’ले सम्मान गरिएको छ ।

चाम्लिङ भाषाविद् बयानसिंह राईलाई ‘सितिमी सम्मान–२०७८’ले सम्मान गरिदै

सितिमीका संरक्षकहरुमध्ये ज्येष्ठ व्यक्ति क्या. जगतराम राईलाई प्रमुख अतिथिको रुपमा आशनग्रहण गराएर सुरु गरिएको उक्त कार्यक्रममा संरक्षकहरुलाई ‘सितिमी कदरपत्र–२०७८’ प्रदान गरिएको थियो ।

कृपया साल्पा अनलाइनको फेसबुक पेज र युट्युब च्यानल सर्च गरी लाइक तथा सब्स्क्राइब गर्नुहोस् ।

Please enter your comment!
Please enter your name here

सम्बन्धित समाचार
spot_img
spot_img

याे पनि पढ्नुस्