पेट्रोलियम पदार्थको मूल्यवृद्धिबारे छानबिन गर्नका लागि संघीय संसद्ले समिति गठन गरेको छ ।
राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिले मूल्यवृद्धि छानबिनका लागि राष्ट्रिय जनमोर्चाकी सांसद दुर्गा पौडेलको संयोजकत्वमा तीन सदस्यीय उपसमिति गठन गरेकाे हाे ।
उपसमितिले निरन्तरको मूल्यवृद्धिकाे कारण, उपभोक्तालाई कसरी राहत दिन सकिने व्यवस्था, मूल्यवृद्धिलाई नियन्त्रण गर्ने वैकल्पिक उपायका बारेमा छानबिन गर्नेछ ।
जसमा खेमप्रसाद लोहनी र लक्ष्मी परियार सदस्य छन् ।
नेपालमा पछिल्लो समय पेट्रोलियम पदार्थको मूल्य निरन्तर उच्च विन्दुमा पुगिरहेको छ ।
पछिल्लो पटक भएको मूल्य समायोजन अनुसार पेट्रोल प्रतिलिटर १४२ रुपियाँ पुगेको छ । यस्तै डिजेल र मट्टीतेलको भाउ १२५ रुपियाँ कायम छ ।