भैरहवा–परासी सडक खण्डमा पर्ने रुपन्देहीकाे रोहिणी खोलामा यात्रुवाहक बस दुर्घटनाग्रस्त हुँदा नौ जनाको मृत्यु भएको छ ।
जनकपुरबाट भैरहवाका लागि छुटेको लु२ख ३८४१ नम्बरको यात्रुवाहक बस आइतबार बिहान साढे ४ बजे पुलबाट खोलामा खसेको हाे ।
जसका कारण बसमा सवार नौ जना मृत्यु भएको छ भने २३ जना यात्रु घाइते भएको प्रहरीले जनाएको छ ।
उपचारको क्रममा पाँच जनाको भैरहवास्थित मेडिकल कलेज र चार जनाको भीम अस्पतालमा मृत्यु भएको जिल्ला प्रहरी कार्यालय भैरहवाका प्रहरी नायव उपरीक्षक नवरत्न पौडेलले बताए ।
चालक निदाएका कारण बसले रोहिणी पुलको रेलिङ तोड्दै खोलामा खसेको प्रहरीको अनुमान छ । घाइतेहरूको भैरहवास्थित भीम अस्पताल र मेडिकल कलेजमा उपचार भइरहेको छ ।
