नेपाली कांग्रेसले खोटाङ जिल्लाका पार्टी सभापति विष्णुकुमार राईलाई पार्टीबाट निष्कासन गरेको छ ।
२०७९ सालको प्रतिनिधिसभा तथा प्रदेशसभाको निर्वाचनमा पार्टीको आधिकारिक उम्मेदवारलाई असहयोग गरेको भन्दै राईलाई निष्कासन गरिएको हो ।
राईले पार्टीको उम्मेदवारलाई असहयोग गरेको बारे केन्द्रीय अनुशासन समितिमा उजुरी परेको थियो ।
उनलाई स्पष्टिकरण सोधिएको थियो ।
तर स्पष्टिकरण चित्तबुझ्दो नभएको भन्दै गत असार १७ गते बसेको समितिको बैठकले उनलाई निष्कासन गर्ने निर्णय गरेको हो ।
उनले बुधबार निष्कासन गरिएको पत्र प्राप्त गरे ।
खाेटाङकाे दिप्रुङ चुइचुम्मा गाउँपालिका–३ घर भएका उनले सामाजिक सञ्जालबाट उक्त पत्र साझा गर्दै ३५ वर्षदेखि राजनीतिमा लाग्दा कहिले प्राप्ति भएको र कहिले गुमाउनु परेको बताए ।
राईले २०७९ काे निर्वाचनमा पार्टीले आफूलाई अन्याय गरेकाेले त्यसका विरुद्धमा डटेरै लागेकाे बताए ।
उनले आफूलाई निष्ठावान खोटाङ्गे कांग्रेसीहरूको साथ रहने दाबी पनि गरे ।