जनता समाजवादी पार्टीकी सांसद लीला सिटौलाले अहिलेको राजनीति वार कि पारको अवस्थामा रहेको र यसबेला जसपा तटस्थ बस्न खोज्नु पार्टी र जनताप्रति धोका रहेको बताएकी छन् ।
जसपाभित्र महन्थ ठाकुर र राजेन्द्र महतोले केपी ओली सरकारबारे तटस्थ बस्ने बताएको विषयमा सांसद सिटौलाले भनिन्, ‘अहिलेको राजनीतिक अवस्था भनेको वार कि पारको हो, यो अवस्थामा तटस्थ बस्नु भनेको पार्टी र जनताप्रति धोका दिनु हो ।’
जसपाका नेता ठाकुर र महतो ओली सरकारलाई समर्थन गर्ने पक्षमा उभिदै आएका छन् ।
तर, डा. बाबुराम भट्टराई, उपेन्द्र यादव र अशोक राई ओली सरकारलाई हटाउनुपर्ने पक्षमा रहँदै आएका छन् ।
नेता ठाकुर र महतो कुन नैतिकताले ओली सरकारलाई समर्थन गर्न खोजिरहेका छन् भन्ने जसपाका आम कार्यकर्ताहरुको प्रश्न छ ।
नेकपा एमालेका अध्यक्षसमेत रहेका प्रधानमन्त्री ओलीले आफूले विश्वासको मत प्राप्त गर्ने उदेश्य राखेर राष्ट्रपति विद्यादेवी भण्डारीमार्फत भोलि वैशाख २७ संसदको विशेष अधिवेशन बोलाएका छन् ।
वैशाख २७ पछि ओली सरकार ढल्ने निश्चित प्रायः भएको छ । ओली सरकारलाई जसपाका ठाकुर र महतो पक्षले अड्याउने प्रयास गरिरहेका छन् । तर, उनीहरु असफल हुनेछन् ।
ओली सरकारलाई मत दिने कि नदिने भन्ने विषय जसपाको संसदीय दलको बैठक हालसम्म बसेको छैन ।
सांसद सिटौलाले ठाकुर पक्षले सुरुमै पार्टीभित्र छलफल नै नगरी ओली सरकारसँग वार्ता गर्न कार्यदल बनाएको विषय नै पार्टी पद्धति विपरित र बदनियतपूर्ण रहेको बताइन् ।
उनले पार्टीभित्रका हरेक महत्वपूर्ण निर्णय बैठकबाटै हुनुपर्ने बताइन् ।
उनले भनिन्, ‘पूर्व राजपाको समूहबाट ओली सरकारसँग वार्ता गर्न जुन कार्यदल बनाइयो, त्यो नै बदनियतपूर्ण गरिएको काम हो, किनभने त्यो पार्टीको सिस्टमबाट गरिएको थिएन ।’