आदिवासी जनजाति आन्दोलनका अगुवा ओम गुरुङले आफूहरुलाई धोका दिने पृथ्वीसुब्बा गुरुङले अहिले आफैले ठूलो धोका पाएको टिप्पणी गरेका छन् ।
नेकपा एमाले अध्यक्ष तथा प्रधानमन्त्री केपी ओलीको पक्षमा लाग्दै आएका गुरुङ हाल गण्डकी प्रदेशको मुख्यमन्त्रीबाट पदच्युत हुनु परेको छ ।
‘जनजाति आन्दोलनका बेला पृथ्वीसुब्बा गुरुङलाई काँध बोकेर हिडियो । आन्दोलनकै भरमा उनलाई अन्तरिम कालको पर्यटन तथा संस्कृतिमन्त्रीको कुर्सीमा बसाइयो । संविधानसभाको निर्वाचनमा विजय गराउन जनतालाई आह्वान गरियो,’ ओम गुरुङले फेसबुकमा लेखेका छन्, ‘तर संविधानसभाको निर्वाचनपछि उनले जनजाति आन्दोलनलाई ठूलो धोका थिए । अहिले उनी आफैले ठूलै धोका पाएका छन् । यो उनको नियतिको भोगाइ हो ।’
उनले नेपालमा हालसम्म दलाल पुँजीवादी राज्यव्यवस्था रहेकोले पृथ्वीसुब्बा गुरुङहरुजस्ता मान्छे रहिरहने तर्क गरेका छन् ।
मोहन वैद्य नेतृत्वको माओवादी निकट रहेका गुरुङले भनेका छन्, ‘तर स्पष्ट हुनुपर्ने कुरा के हो भने यो दलाल पुँजीवादी राज्य व्यवस्था रहेसम्म चाकडी र चुकलीको भरमा जो जे पनि हुन सक्छन् । त्यसै उन (पृथ्वीसुब्बा गुरुङ)को आरोह अवरोहमा मलाई न हर्ष न विस्मत । किनभने दलाल पुँजीवादी व्यवस्थाका नेताहरु जनताप्रतिभन्दा मालिकप्रति बढी बफादार हुन्छन् ।’