बझाङ । ब्राह्मणहरुकाे घर नजिक दलितले घर निर्माण गरेको भन्दै दलितकाे निर्माणाधीन घर भत्काइयो छ ।
बझाङकाे बित्थडचिर गाउँपालिका वडा नं ७ स्यालढुंगामा दलितले ब्राह्मणकाे घर नजिक घर निर्माण गरेको भन्दै निर्माणाधीन घर भत्काइएकाे हाे ।
तीन दर्जन भन्दा बढी गैरदलितहरुले निर्माणाधीन पुड्के ओखेडाको घर भत्काइदिएका हुन् ।
दलितले आफूभन्दा माथि घर बनाएर बस्न लागेको भन्दै घर भत्काएको पीडित पुड्के ओखेडाले बताए ।
गत बुधवार बिहान ११ बजेको समयमा निर्माण भइरहेको घरमा साेही गाउँका ब्राह्मणहरुले घर भत्काएको पीडित पुड्के ओखेडाकाे भनाइ छ ।
‘मैले विगत २५ वर्षदेखि भोग चलन गर्दै आएको छु । मैले अर्को मान्छेबाट जग्गा किनेको हो । अहिले घर लगाउन सुरु गरेको थिए,’ उनले भने, ‘गाउँमा रहेका ब्राह्मणहरु आएर तँ डुम दलित हामी भन्दा माथि हुनै सक्दैन । तँलाई यहाँ बस्ने अधिकार छैन भन्दै भत्काइदिए ।’
उक्त घटनाकाे भिडियो हाल सामाजिक सञ्जालमा सार्वजनिक भएको छ ।
ओखेडाको घर कृष्ण जोशी, भवानी जोशी र कित्थे जोशीको नेतृत्वमा ३०/४० जनाको टोलीले भत्काइदिएको पीडित पुट्केका छोरा करनले बताए ।
निर्माणाधीन घर भत्काइएकाेबारे जिल्ला प्रहरी कार्यालय बझाङमा उजुरी परेकाे छ । हालसम्म तीन जनालाई अनुसन्धानको लागि हिरासतमा लिइएकाे जिल्ला प्रहरी कार्यालय बझाङका डिएसपी जागेश्वर भण्डारीले बताए । थाहायात्रा डटकमबाट