खोटाङका दशमध्ये चार स्थानीय तहले किरात सिरिजङ्गा लिपिलाई मान्यता दिँदै लेटरहेडमा समावेश गरेका छन्।
दिक्तेल रुपाकोट मझुवागढी नगरपालिका, हलेसी तुवाचुङ नगरपालिका, जन्तेढुङ्गा गाउँपालिका र खोटेहाङ गाउँपालिकाले लेटरहेडमा किरात सिरिजङ्गा लिपि समावेश गरेका हुन्।
सबैभन्दा पहिले जन्तेढुङ्गा गाउँपालिकाले २०७८ साउन १ गतेदेखि लेटरहेडमा किरात सिरिजङ्गा लिपिमा गाउँपालिकाको नाम लेखेर चलाउन थालेको हो।
दिक्तेल रुपाकोट मझुवागढी नगरपालिकाले हालै अर्थात २०८२ साउन १ गतेदेखि किरात सिरिजङ्गा लिपि प्रयोगमा ल्याएको छ।
साकेला गाउँपालिका, केपीलासगढी गाउँपालिका, दिप्रुङ चुइचुम्मा गाउँपालिका र ऐसेलुखर्क गाउँपालिकाको नेतृत्व किरात राई समुदायकै जनप्रतिनिधिले गरिरहेको भए पनि उनीहरूले हालसम्म किरात सिरिजङ्गा लिपिलाई लेटरहेडमा समावेश गरी सम्मान गर्ने कुरामा चासो देखाएका छैनन्।
साकेला र केपीलासगढी गाउँपालिकाका अध्यक्ष र उपाध्यक्ष दुवै राई समुदायका हुन्। साकेलाका अध्यक्ष रविप्रकाश राई र उपाध्यक्ष बिर्सिका राई हुन्।
केपीलासगढीका अध्यक्ष समिर राई र उपाध्यक्ष गुरुराज राई हुन्।
ऐसेलुखर्क र दिप्रुङ चुइचुम्माका अध्यक्ष पनि राई नै हुन्।
बराहपोखरी र रावाबेसी गाउँपालिकाको नेतृत्वमा भने गैरराई छन्। बराहपोखरीका अध्यक्ष शालिकराम बन्जरा र उपाध्यक्ष भुवलराज राई छन्।
रावाबेसीका अध्यक्ष फटिककुमार श्रेष्ठ र उपाध्यक्ष कौशिला गुरुङ छन्।
दिक्तेल रुपाकोट मझुवागढी नगरपालिकाका मेयर तीर्थराज भट्टराई भए पनि उनले लेटरहेडमा किरात सिरिजङ्गा लिपि समावेश गर्ने निर्णय गरेका छन्।
उनी नेपाली कांग्रेसबाट निर्वाचित मेयर हुन्।
