‘गड एन्जल’ भनिने भक्तकुमार राईका सहयोगीहरुले सांस्कृतिक अभियान्ता भद्रगोल किराती (मनोज कुमार राई)लाई ज्यान मार्ने धम्की दिएका छन् ।
किरातीले पनि आफूलाई धम्की दिएको भन्दै (हिजो) आइतबार जिल्ला प्रशासन कार्यालय ललितपुरमा उजुरी दिएका थिए ।
प्रहरीले (आज) सोमबार दुवै पक्षलाई बोलाएर छलफल गराएको छ ।
तर, भक्तकुमार राईको तर्फबाट जिल्ला तहका प्रतिनिधिहरु मात्रै उपस्थित भएपछि पुनः आगामी असोज १ गते दुवै पक्षबीच छलफल गरिने भएको छ ।
किरातीले आफूलाई दुईजना व्यक्तिले धम्की दिएको बताए । जसमध्ये एकजना हिन्दी भाषामा बोल्ने उनको भनाइ छ ।
‘हिन्दीमा बोल्छ, म विरगञ्जबाट हुँ भन्छ,’ किरातीले भने, ‘सायद त्यो मान्छे परिचालित होला ।’ धम्की दिनेको फोन आउँदा नम्बर ‘अन्नोन’ देखिने उनले बताए ।
किरातीले केही दिनअघि भक्तकुमार राईले सगरमाथाको चुचुरोमा ३२ घण्टा २७ मिनेट तपस्या गरेको भनी झुटो प्रचार गरेको रहस्य खोलिदिएका थिए ।
किरातीले यसबारे पर्यटन विभागसँग आधिकारिक सूचना मागेका थिए ।
विभागले ३२ घण्टा २७ मिनेट सगरमाथाको चुचुरोमा बसेको प्रमाणित गरिदिन निवेदन भक्तकुमार राईको निवेदन परे पनि उक्त विषय प्रमाणित गर्न नसकिने जवाफ दिएको जनाएको थियो ।
किरातीले यहीँ विषय बाहिर ल्याएपछि उनलाई धम्की दिइएको हो ।
उनका अनुसार सोमबारको छलफलमा भक्तकुमारको तर्फबाट जिल्ला तहका प्रतिनिधिहरु सुस्मा बुढा मगर, रामेश्वर राई र भीमकुमार राई मात्रै उपस्थित भए ।
तर, असोज १ गते हुने छलफलमा भने ‘सुप्रिम मास्टर गड एन्जल’समेत भनिने हाल क्यानडियन नागरिक भइसकेका भक्तकुमार राई र संस्थाका अध्यक्ष खेमबहादुर लिम्बुलगायत पदाधिकारीहरु नै उपस्थित गराउने सहमति–पत्रमा उनीहरुले हस्ताक्षर गरेका छन् ।
यता, किरातीलाई साथ दिँदै किरात राई यायोक्खाका केन्द्रीय सहअध्यक्ष टिकासरि राई, उपाध्यक्ष जनक राई, उपमहासचिव मातृका राई, सचिव सुमन राईलगायत अगुवाहरु प्रहरी कार्यालयमा पुगेका थिए ।