नेकपा एमालेका अध्यक्ष केपी शर्मा ओलीले खोटाङ जिल्ला एमालेको किल्ला रहेको भन्दै फेरि पनि एमालेकै किल्लाको रुपमा रहने बताएका छन् ।
एमाले खोटाङले हिजाे दिक्तेलमा आयोजना गरेको जनसभामा उनले हाल देशका युवा शक्तिदेखि हरेक तप्का एमालेलाई विजयी गराउन क्रियाशिल रहेको बताए ।
‘आज युवाहरु नेकपा एमालेका पक्षमा दृढताका साथ, उत्साहका साथ खुलेर युवा शक्ति उठेको छ र आफै परिचालित भएको छ, म धन्यवाद भन्न चाहन्छु,’ उनले भने, ‘आज सामाजिक जिवनका हरेक तप्का नेकपा एमालेको पक्षमा एमालेलाई विजयी गराउन क्रियाशिल छ । त्यसकारण म तपाईंहरु सबैलाई धन्यवाद भन्न चाहन्छु र मैले विश्वास लिएको छु, खोटाङ जिल्ला एमाले किल्ला, अब फेरि पनि यो एमाले किल्लाको रुपमा रहनेछ ।’
सो क्रममा उनले एमाले फुटेपछि झन बलियो भएर आएको जिकिर गरे ।
उनले भने, ’२०५४ सालमा एमाले फुटाइयो तर एमाले जस्ताको जस्तै, अहिले पनि एमाले फुटाइयो एमाले जस्ताको तस्तै, जस्ताको जस्तै हैन बरु एमाले झन बलियाे भएको छ ।’
उनले विभिन्न भ्रममा परेर पार्टी छोडेकाहरु पनि अहिले एमालेमै फर्किन थालेको बताए ।
सो क्रममा उनले पहिलो पटक २०५१ सालमा एमालेले नै सामाजिक सुरक्षा भत्ताको लोककल्याणकारी अवधारणा ल्याएको बताए ।
उनले भने, ’२०५१ सालमा महिनामा एक सय रुपैयाँ भत्ता दिन सुरु गरेका थियौ । अहिले महिनामा चार हजार पुर्याएका छौं ।’
उनले अबको स्थानीय निर्वाचनमा एमालेले दुई तिहाइभन्दा बढी स्थानमा जित्ने दाबी पनि गरे ।