समाजवादी ट्रेड युनियन महासंघको पुनर्गठन गरिएको छ ।
पुनर्गठनपछि महासंघको अध्यक्षमा अर्जुन लम्साल र महासचिवमा दयाराम राईलाई चयन गरिएको छ । समाजवादी ट्रेड युनियन महासंघ जनता समाजवादी पार्टी नेपालको आधिकारिक जनवर्गीय संगठन हो ।
नवनियुक्त अध्यक्ष लम्साल यसअघि संगठनका महासचिव थिए भने राई उपमहासचिव थिए । महासंघका तत्कालीन अध्यक्ष लालध्वज नेम्वाङले पार्टी छोडेपछि हाल महासंघको पुनर्गठन गरिएको हो ।
महासंघका सहअध्यक्ष जोगीलाल यादव र उपाध्यक्ष हेमन्त मान्डव्यलाई संरक्षकमा राख्ने निर्णय गरिएको छ । महासंघको प्रवक्तामा गोपाल राईलाई चयन गरिएको छ । बाँकी रहेका पदाधिकारीहरु यथावत नै राखिएको छ ।
नवनियुक्त अध्यक्ष लम्सालले अब सबै प्रदेशमा संगठन पुनर्गठन गरी चुस्तदुरुस्त बनाउने र पार्टीको नीति र सिद्धान्तमा रहेर नेपालको मजदुर आन्दोलनलाई अघि बढाउने बताए ।