गायक तथा संगीतकार शिव परियारले धरान उपमहानगरपालिकाका मेयर हर्क साम्पाङले सामाजिक सञ्जालमा दलित समुदायलाई होच्याउने गरी दिएको अभिव्यक्तिप्रति आपत्ति जनाएका छन् ।
उनले ‘चमारे बुद्धि’ भनेर होच्याउने मनस्थितिको वाक्य बोल्न सकैलाई छुट नभएको प्रष्ट पारेका छन् ।
मेयर साम्पाङले दुई दिनअघि फेसबुकमा लेखेका थिए, ‘जोडी खोज्नेहरुको बास उठ्न सक्छ ! बल होइन बुद्धि लगा चमारे बुद्धि !’
उनले कसलाई यस्तो शब्द प्रयोग गरी प्रतिक्रिया जनाउन खोजेका हुन् भन्ने थाहा छैन ।
तर छिनछिनमा स्टाटस लेखिरहने उनले दलित समुदायलाई होच्याउने खालको परम्परागत व्यवहार देखाएपछि दलित अधिकारकर्मीहरुले आपत्ति जनाएका हुन् ।
गायक परियारले आज फेसबुकबाट भनेका छन्, ‘बाहुन, क्षेत्री, दमाई, कामी, राई, लिम्बू, गुरुङ, मगर, जोगी, सन्यासी भनेर कुनै पनि जातको नाम लिन पाइन्छ । तर चमारे बुद्धि, कामीको जस्तो अनुहारजस्ता होच्याउने मनस्थितिका वाक्य बोल्न कसैलाई छुट छैन ।’
उनले सामाजिक सञ्जालमा मनपरि बोल्ने र बाहुल्यताको आडमा त्यसलाई सदर गर्ने गतल संस्कार बन्द गर्नुपर्ने बताएका छन् ।
मेयर साम्पाङका प्रखर समर्थकहरुले साम्पाङको बचाउ गर्न खोजेकाले गायक परियारले बाहुल्यताको आडमा त्यस्ता कुरालाई सदर गर्ने गलत संस्कार भनेको अनुमान गर्न सकिन्छ ।
मेयर साम्पाङलाई आफ्नाे अभिव्यक्ति सच्याउन राष्ट्रिय दलित आयोगले समेत आग्रह गरेको छ ।
तर उनले आफूले कुनै गल्ती नगरेको जिकिर गरेका छन् ।
