डा. रविन्द्र पाण्डेले अबको तीन हप्ता सबैले दुःख सहेर घरमै बस्ने हो भने कोरोनाभाइरस संक्रमणको दर घट्दै जाने बताएका छन् ।
उनले यस अवधि नेपालका लागि अत्यन्तै कठिन अवस्था रहेको समेत बताएका छन् । गत मंगलबार सामाजिक सञ्जाल फेसबुकबाट डा. पाण्डेले यो जानकारी गराएका हुन् ।
उनले भनेका छन्, ‘आगामी तीन हप्ता नेपालको लागि अत्यन्तै कठिन अवस्था छ । अस्पतालमा बेड र अक्सिजनको चर्को अभाव छ । दुःख सहेरै भए पनि यो तीन हप्ता घरभित्र नै बसौ ।’
उनले पसल, बाटो, चोक, खेल्ने ठाउँ सबैतिर कोरोनाभाइरस संक्रमित छन् भनेर सकभर घरबाहिर ननिस्कन आग्रह गरेका छन् ।
‘निस्कनै परे डबल मास्क लगाएर, ६ फिट भन्दा धेरै दुरी कायम गरेर, हात साबुनपानी/स्यानिटाइजरले सफा गरेर सुरक्षित बनौ, भेटघाट बन्द गरौ,’ डा. पाण्डेले लेखेका छन्, ‘यो तीन हप्ता दुःख सह्यौ भने संक्रमणको दर घट्दै जानेछ । रोकथाम भन्दा उपचार निकै कठिन र जोखिमपूर्ण छ ।’
उनले यस पटकको कोरोनाभाइरसको प्रजातिलाई नजरअन्दाज नगर्न चेतावनी दिँदै सबै जना कडा सेल्फ लकडाउनमा बस्न आग्रह समेत गरेका छन् ।