जिल्ला प्रशासन कार्यालय सुर्खेतले अन्य व्यक्तिलाई राउटे समुदायको बस्तीमा जान रोक लगाएको छ ।
राउटे युवतीमाथि यौन दुर्व्यवहार भएको भिडियो राउटे समुदायमा पुग्न नदिन बस्तीमा प्रवेशमा रोक लगाइएकाे जिल्ला प्रहरी कार्यालय सुर्खेतले जनाएकाे छ ।
राउटे बस्तीमा कसैलाई आउजाउ गर्न नदिनका लागि २२ जना प्रहरी खटाइएको छ । फिरन्ते जीवन बिताउँदै आएका राउटे समुदाय हाल सुर्खेतको गुर्भाकोट नगरपालिका–११ आँपसोतीस्थित भेरी नदी किनारमा बसिरहेका छन् ।
राउटे युवतीमाथि भएको यौन दुर्व्यवहारको घटना अन्य समुदायका नागरिकले राउटे बस्तीसम्म पुर्याउन सक्ने सम्भावना बढेपछि बस्ती प्रवेशमा रोक लगाएको प्रहरीले जनाएको छ ।
उक्त घटनाबारे जानकारी पाए पीडित युवतीलाई राउटे समुदायले नै अस्वीकार गर्ने र भित्रै कडा सजाय दिन सक्ने अनुमान गरिएकाे छ ।
टिकटक र युट्युबबाट चिनिएकी सम्झना शाही (राउटे)सहित दुई राउटे युवतीमाथि गुर्भाकाेट-९ स्थित एक हाेटलभित्र लगेर याैन हिंसा गरिएकाे भिडियाे भाइरल भएकाे थियाे ।
प्रहरीले उक्त भिडियाेमा देखिने चमनसिंह घर्ती, भूपेन्द्र बुढा र होटल सञ्चालक मिलन पुनलाई पक्राउ गरी कारवाही अघि बढाएकाे छ ।