साउनबाट कक्षा १२ को नयाँ पठनपाठन सुरु गरिने तय भए पनि अहिलेसम्म पाठ्यपुस्तक छाप्ने काम सुरु भएकाे छैन ।
हालसम्म पनि पाठ्यपुस्तक छाप्ने काम सुरु नहुँदा विद्यार्थीले निःशुल्क पाउने पाठ्यपुस्तक पाउनै गाह्राे हुने देखिएकाे छ ।
कक्षा १२ को तीनवटा विषयको पाठ्यपुस्तक सरकारले छाप्नेछ । तर पाठ्यपुस्तक लेखन कार्य पूरा गरेर प्रकाशनका लागि अन्तिम स्वीकृति दिइएको छैन ।
पाठ्यक्रम विकास केन्द्रका निर्देशक तथा सूचना अधिकारी गणेशप्रसाद भट्टराईले असार २५ गतेसम्म पाठ्यपुस्तक लेखन कार्य पूरा गरी प्रकाशनका लागि जनक शिक्षा सामग्री केन्द्रमा पठाउने गरी तयारी भइरहेको बताए ।
यसपटक सरकारले तीनवटा अनिवार्य विषय अङ्ग्रेजी, नेपाली र सामाजिक तथा जीवनोपयोगी शिक्षाका पुस्तक प्रकाशन गर्नेछ ।
गणित विषयको पुस्तक लेखन कार्य जारी रहेकाले केही समय लाग्ने केन्द्रले जनाएकाे छ । तर, ढिलोमा पनि आगामी साउन १५ गतेसम्ममा विद्यार्थीको हातमा पाठ्यपुस्तक पुग्ने केन्द्रकाे दाबी छ ।