नेपालका किरातजन्य जातीय संस्थाका प्रतिनिधिहरुबीच साझा किरात लिपि निर्माणबारे छलफल चलिरहेका बेला खोटाङस्थित जन्तेढुङ्गा गाउँपालिकाले आफ्नाे लेटरहेडमा किरात सिरिजङ्गा लिपि प्रयोगमा ल्याएको छ ।
गाउँपालिकाले गत असार २७ गतेको कार्यपालिकाको बैठकले गरेको निर्णयअनुसार लेटरहेडमा देवनागरीका साथै किरात सिरिजङ्गा लिपि प्रयोग गरेको हो ।
कार्यपालिकाले नयाँ आर्थिक वर्ष अर्थात् २०७८ साउन १ गतेदेखि लेटरहेडमा किरात लिपि समेत समावेश गरी प्रयोग गर्ने निर्णय गरेको थियो ।
हाल किरात राई यायोक्खा, किरात याक्थुङ चुम्लुङ, किरात याक्खा छुम्मा र सुनुवार सेवा समाजलगायत संस्थाका प्रतिनिधिहरुले एउटै साझा लिपि निर्माण गरी लेखन पद्धतिको विस्तार गर्ने प्रयास गरिरहेका छन् ।
चुम्लुङले २०४९ सालदेखि नै संस्थागत निर्णय गरी किरात सिरिजङ्गा लिपि प्रयोग गर्दै आएको छ । हाल सोही लिपिलाई किरातीहरुको साझा लिपिको रुपमा विकास गर्ने प्रयास भइरहेको छ ।
गत असार अन्तिम साता काठमाडौंको कोटेश्वरस्थित यायोक्खा कार्यालयमा आयोजित एक कार्यक्रममा चुम्लुङका अध्यक्ष योगराज लिम्बूले लिपिको नाम तय गर्दा भने सिरिजङ्गालाई श्रेय दिनुपर्ने बताएका थिए ।
जसमा अन्य संस्थाका प्रतिनिधिहरु तयार देखिएका थिए ।
तर, किरात सिरिजङ्गा लिपिमा नेपालका करिब तीन दर्जन किराती भाषाहरु समेट्नका लागि सो लिपिका स्वर तथा व्यञ्जन वर्णहरु थप्नुपर्ने भाषाविद् डा. तारामणि राईले सुझाव दिएका थिए ।
