खुकुरी खेलकाे आठवटा विधामा एकसाथ विश्वकीर्तिमान (गिनिज बुक अफ वल्ड रेकर्डस्) राख्नका लागि अभ्यास गरिरहेका मार्सल आर्टका खेलाडी किरण राईलाई मंगलबार सात लाख १३ हजार रुपैयाँ सहयोग प्रदान गरिएको छ ।
काठमाडौँको कोटेश्वरस्थित किरात राई यायोक्खाको सुम्निमा हलमा किरात राई खेलकुद संघले एक कार्यक्रमको आयोजना गरी राईलाई आर्थिक सहयोग प्रदान गरेको हो ।
उक्त सहयोग रकम तेक्वान्दोका अन्तर्राष्ट्रिय खेलाडी तथा सगरमाथा तेक्वान्दो डोजाङ बेलायतका संस्थापक अध्यक्ष राष्ट्र राईको पहलमा किरात राई यायोक्खा बेलायत र भोजपुर सेवा समाज बेलायतद्वारा संकलन गरिएको हो ।
नेपाली कांग्रेसकी संघीय सांसद महेन्द्र लिम्बु तथा किरात राई यायोक्खाका अध्यक्ष दिवस राईमार्फत सहयोग रकम हस्तान्तरण गरिएको हो ।
सो क्रममा ‘द कमाण्डो’ नामक नेपाली चलचित्रका नायक राजकुमार राई, पूर्व माओवादी लडाकू तथा म्याराथन खेलाडी मिरा राई लगायतले पनि भोजपुर घर भएका खेलाडी किरण राईलाई आर्थिक सहयोग गरेका थिए ।
किरात राई खेलकुद संघका अध्यक्ष महेन्द्र राईको अध्यक्षतामा भएको उक्त कार्यक्रममा तेक्वान्दोका ग्राण्ड मास्टर आठौँ साफका स्वर्ण र दशौँ एसियन गेमका काँस्यपदक विजेता समेत रहेका नायक राजकुमार राई, अल्ट्रा म्याराथन खेलाडी मिरा राईसहित १३औँ दक्षिण एसियाली खेलकुद (साग)का पदक विजेता किरात राई खेलाडीहरुलाई फेटा लगाएर सम्मान गरिएको थियो ।
१३औँ सागमा राई समुदायबाट २८ जना खेलाडीहरु सहभागी भएकोमा २६ जनाले विभिन्न पदक पाएका थिए ।
जसमध्ये मंगलबारको कार्यक्रममा करिब एक दर्जन खेलाडीहरुमात्र सहभागी हुन आइपुगेका थिए ।
कार्यक्रममा खेलकुद संघका अध्यक्ष महेन्द्र राईले खेलाडी किरण राईलाई आर्थिक सहयोग गर्नुपर्ने कारणसहित कार्यक्रमबारे प्रकाश पारेका थिए ।
जसमा प्रमुख अतिथि रहेकी सांसद लिम्बुले किरण राईलाई शुभकामना दिँदै अब राई खेलाडीहरु संगठित भएर खेल क्षेत्रमा अझ उपलब्धि हासिल गर्न लाग्नुपर्ने बताइन् ।
यायोक्खाका अध्यक्ष दिवस राईले किरात राईहरु खेल क्षेत्रमा मात्र नभएर अब कला संगीत, प्रशासनदेखि राजनीति क्षेत्रमा पनि अग्रस्थानमा रहेको बताए ।
आफूलाई आर्थिक लगायत विभिन्न खालको सहयोग गरेकोमा खेलाडी किरण राईले आभार व्यक्त गरे । कार्यक्रममा पूर्व ब्रिटिस आर्मी समेत रहेका नायक राजकुमार राईले पनि शुभकामना दिएका थिए ।
