लोकप्रिय कलाकार दयाहाङ राईले राष्ट्रिय जनगणना–२०७८ मा जातिको महलमा राई, मातृभाषामा आआफ्नाे थरगत भाषा र धर्मको महलमा किरात लेखाउन किरात राई समुदायमा आग्रह गरेका छन् ।
राष्ट्रिय जनगणनासम्बन्धी किरात राई यायोक्खाले तयार पारेको भिडियो सन्देशमा उनले आफूले जातिमा राई र मातृभाषामा बान्तावा लेखाउने बताए ।
उनले भनेका छन्, ‘गणकहरु आउँदा म जातिको महलमा राई लेखाउँछु, तपाईहरुले पनि लेखाउन अनुरोध गर्दछु । मातृभाषाको महलमा म बान्तावा भएकोले बान्तावा भाषी लेखाउँछु र तपाई जुन भाषीको हुनुहुन्छ त्यो भाषा लेखाउनुहोला ।’
भोजपुर घर भएका उनले दोस्रो भाषामा नजिक रहेको राईहरुको कुनै एक भाषा र धर्ममा किरात लेखाउन आग्रह गरेका छन् ।
राष्ट्रिय जनगणनामा यायोक्खाले जातिमा राई, मातृभाषा र पुर्खाको भाषामा आआफ्नाे थरगत भाषा, दोस्रो भाषामा नजिक रहेका राईहरुको कुनै एक भाषा र धर्मको महलमा किरात लेखाउने अभियान चलाइरहेको छ ।
२०६८ सालको जनगणनामा पनि राईहरुले समेत धर्ममा हिन्दु, मातृभाषामा कसैले राई भाषा वा कसैले नेपाली लेखाएको हुनाले यसपटक सही तत्थ्याङ्क निकाल्न यायोक्खा तथा विभिन्न भाषिक संस्थाहरुले सचेतना अभियान चलाइरहेका छन् ।
राष्ट्रिय जनगणना कात्तिक २५ गतेदेखि मंसिर ९ गतेसम्म देशभर एकसाथ हुँदैछ ।
