किरात समुदायको प्रमुख सांस्कृतिक चाड उधौली आजदेखि सुरु भएको छ ।
किरातीहरुले हरेक मंसिरे पूर्णिमामा उधौली र वैशाखे पूर्णिमामा उभौली मनाउँछन् । उधौली–उभौली किरातीहरुको पितृ र प्रकृतिपुजामा आधारित सांस्कृतिक चाड हो ।
उधौलीमा अन्नबाली पाकेपछि नयाँ अन्नको परिकार बनाएर पहिला पितृ र प्रकृतिलाई चढाएर खुसी मनाउँदै आफूले खान थाल्ने चलन किरातीहरुमा छ ।
उभौलीमा अन्नबाली सप्रियोस् दुख्बिमार नलागोस् भन्ने कामनासहित पितृको पुजा गरिन्छ ।
राई, लिम्बू, याक्खा, सुनुवार, थामीलगायत समुदायले उधौली–उभौली मनाउने गर्छन् । उनीहरुले यसलाई आ–आफ्नाे तरिकाले मनाउने गरेका छन् ।
राईहरुले उधौली साकेला भन्छन् भने लिम्बूहरुले चासोक तङनाम भन्छन् ।
उधौली–उभौलीमा राईहरुले पितृको पुजा गरी प्रकृतिको विभिन्न जीवजनावरहरुको हाउभाउ देखाउँदै साकेला सिली नाच्ने गर्छन् । साकेला सिलीमा खेती गरिएको हाउभाउ पनि देखाइन्छ ।
यस चाडमा किरातीहरुले जाडरक्सी, नयाँ अन्न र मासुका परिकार खाँदै शुभकामना आदानप्रदान गर्ने गरेका छन् ।
उधौलीको अवसरमा सरकारले आज किरातीहरुका लागि सार्वजनिक बिदा दिएको छ ।
तर किरात समन्वय समितिले भने उधौली–उभौलीमा राष्ट्रियस्तरको सार्वजनिक बिदा दिन माग गर्दै प्रधानमन्त्री शेरबहादुर देउवालाई ज्ञापन–पत्र बुझाएको थियो ।