नेकपा माओवादी केन्द्रका नेता वर्षमान पुनले जनता समाजवादी पार्टी नेपालको नाम जोडेर समाजवादी केन्द्र बनाउन लागेको भन्दै गलत प्रचारबाजी गरेकोप्रति जसपा नेपालका संघीय परिषद सदस्य धनबहादुर तामाङले आपत्ती जनाएका छन् ।
नेता तामाङले जसपाबाट कारबाहीमा परिसकेका डा. बाबुराम भट्टराईलाई पुनले जसपाकै नेताको रुपमा प्रचारबाजी गरेको आरोप लगाएका हुन् ।
पुनले नेकपा माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, बामदेव गौतम र डा. बाबुराम भट्टराईबीच समाजवादी केन्द्र बनाएर जाने सहमति भएको सार्वजनिक अभिव्यक्ति दिएका थिए ।
जसमा उनले डा. भट्टराईलाई जसपाकै नेताको रुपमा प्रस्तुत गरेका थिए ।
जसपाबारे गलत प्रचार गरेकोमा तामाङले खेद प्रकट गर्दै गठबन्धनको नाममा भागबन्डा र बार्गेनिङ नगर्न चेतावनी दिए ।
दाहाल, नेपाल, गौतम र भट्टराईबीचको समाजवादी केन्द्र नश्लीयतामा आधारित रहेको तामाङको भनाइ छ ।
