स्वास्थ्य तथा जनसंख्यामन्त्री शेरबहादुर तामाङले सम्पत्ति विवरण सार्वजनिक गरेका छन् ।
आफू र श्रीमतीकाे नाममा गरी आफूसँग १४ ठाउँमा जग्गा रहेकाे मन्त्री तामाङले उल्लेख गरेका छन् ।
मन्त्री तामाङकी श्रीमती उषाकला राई पनि हाल प्रदेश १ मा सामाजिक विकासमन्त्री हुन् । उनी खाेटाङकी हुन् ।
मन्त्री तामाङसँग सिन्धुपाल्चाे, काठमाडाैं, खाेटाङ र माेरङका विभिन्न स्थानमा जग्गा छ । जसमध्ये तीन ठाउँकाे जग्गाचाहिँ आफूले अंशबापत पाएकाे उनले उल्लेख गरेका छन् ।
काठमाडाैंकाे गाेकर्णेश्वरमा उषाकला राईकाे नाममा अढाइ तले घर रहेकाे विवरणमा उल्लेख छ ।
यसैगरी उनले आफूसँग २२ ताेला सुन रहेकाे खुलाएका छन् । तीमध्ये केही पुर्ख्याैली र केही खरिद गरेकाे विवरणमा उल्लेख छ ।
मन्त्री तामाङले हाल आफूसँग एभरेस्ट बैंकमा रहेकाे खातामा २ लाख १६ हजार १ सय २५ रूपैयाँ बचत रहेकाे उल्लेख गरेका छन् ।