जनता समाजवादी पार्टीबाट कारवाहीमा परेका महन्थ ठाकुर र राजेन्द्र महतो क्रमशः कमजोर बन्दै गएका छन् ।
प्रतिनिधिसभा दोस्रोपटक पुनःस्थापना भएपछि ठाकुर–महताे पक्षका सात जना सांसदहरु यादवको पक्षमा लागेका छन् ।
३२ जना सांसदहरुमध्ये यादवको पक्षमा १९ जना पुगेका छन् । यसअघि यादवकाे पक्षमा १२ र काठुरकाे पक्षमा २० जना सांसद थिए ।
पार्टीको निर्णय र नीति विपरीत एमाले अध्यक्ष केपी ओलीलाई प्रधानमन्त्रीमा मतदान गरेपछि जसपाले महन्थ ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई निष्कासन गरेको थियो ।
तर, ठाकुर–महताे पक्षले पनि यादवलाई पार्टीबाट निष्कासन गरेको भन्दै आफूहरु नै आधिकारिक दल भएको दाबी गरी निर्वाचन आयोगलाई पत्र लेखेको थियो ।
हाल आयोगमा जसपाको दुवै समूहबीच आधिकारिकताको विवाद कायम छ ।
तर अब जसपाभित्र संसदीय दलमा समेत यादव समूह बहुमतमा पुगेकाे छ ।
जसपाको कार्यकारिणी समितिमा उपेन्द्र समूह पहिल्यै बहुमतमा थिए । सोही आधारमा जसपाले महन्थसहितका नेताहरुमाथि कारवाही गरेका थिए ।
जसपाको ५१ सदस्यीय कार्यकारिणी समितिमा यादवकाे पक्षमा ३२ सदस्य थिए ।
पार्टी समितिमा ३२ र संसदीय दलमा १२ सदस्य रहेको यादव समूहले हाल दुवै निकायमा बहुमत बनाइसकेको छ भने महन्थ समूहका थप सांसद तथा पार्टी समितिका सदस्यहरु पनि मूल पार्टीमा फर्कदैछन् ।
आज बसेको संसदीय दलको बैठकमा १९ जना सांसदहरु उपस्थित भएका थिए । जसपाले नेपाली कांग्रेसका सभापति समेत रहेका प्रधानमन्त्री शेरबहादुर देउवालाई विश्वासको मत दिने निर्णय गरेको छ ।
