जनता समाजवादी पार्टी (जसपा) फुट्न लागेको समाचार आइरहेका बेला केन्द्रीय सदस्य जुद्ध ढाक्रेले तीन प्रमुख नेताहरुको कार्यशैलीको आलोचना गरेका छन् ।
ढाक्रेले सामाजिक सञ्जालमार्फत जसपाकाे संघीय परिषद् अध्यक्ष डा. बाबुराम भट्टराई, केन्द्रीय समिति अध्यक्ष उपेन्द्र यादव र वरिष्ठ नेता अशोक राईकाे शैलीबारे आलोचनात्मक टिप्पणी गरेका छन् ।
उनले उपेन्द्र यादवले पार्टीमा मधेसी बाहेक कार्यकर्ताहरुलाई नदेख्ने, अशोक राई पार्टीकाे बैठकमा नबोल्ने र केहीको मात्र कुरा सुन्ने र डा. बाबुराम भट्टराई पार्टीभित्र छलफल र अनुमोदन नै नगरी एमसीसी पास गर्नुपर्छ भन्दै हिड्ने गरेको भनी आलोचना गरेका हुन् ।
शीर्ष नेताहरुको यही शैलीका कारण पार्टी विवादमा परेकाे र कार्यकर्ताहरुले पनि न्याय पाउने अवस्था नभएकाे उनको भनाइ छ ।
‘जसपामा विवादको कुरा उठ्न थालेको छ । शीर्षस्थ नेता भनाउँदाहरुले कार्यकर्ताहरुलाई न्याय दिन सकेका छैनन्,’ फेसबुकमा उनले लेखेका छन्, ‘उपेन्द्र मधेसी बाहेक नदेख्ने, अशोक नबोली केहीको मात्रै कुरा सुन्ने र डा. पार्टीमा अनुमोदन नगरी एमसीसी पास गर्नुपर्छ भन्ने यो ठिक भएन ।’
