जनजाति समुदायका अग्रज पत्रकार खिम घलेले एमसीसीलाई गिजोलिरहने अवस्था रह्यो भने नेपालमा वैदेशिक हस्तक्षेप बढ्ने बताएका छन् ।
यही कारण अब एमसीसी पास गरेर जानुपर्ने उनको भनाइ छ ।
उनले एमसीसीकै कारण वर्तमान गठबन्धन नतोडिने समेत बताएका छन् । एमसीसी संसदबाट पास गर्दा जनमत पनि नभड्किने उनको भनाइ छ ।
नेकपा एमाले समर्थित पत्रकार मानिने उनले अब एमालेले एमसीसी एक विकासको अनुदान हो भन्ने कुरा जनताको तहमा गएर प्रष्ट पार्नुपर्ने औंल्याएका छन् ।
फेसबुकबाट उनले भनेका छन्, ‘एमाले नेतृत्वले अब एमसीसी एक विकास अनुदान रहेको कुरालाई स्पष्ट पार्दै विकास समृद्धिमा आफ्नाे विश्वास स्पष्ट पार्ने बेला आएको छ । यो मामिलामा आफ्नाे कित्ता स्पष्ट पार्न नसक्नु भनेको पिपलपाते अवस्था हो ।’
हाइलाइट्स् टुरिजम डटकमका सम्पादक रहेका उनले एमसीसीलाई गिजोलिरहने अवस्था रह्याे भने चाहिँ नेपालमा अमेरिका र चीनको हस्तक्षेप बढ्ने चेतावनी दिएका छन् ।
