किरात राई यायोक्खा बेलायतका अध्यक्ष तथा ब्रिटिश गोर्खा आर्मीका निवृत्त मेजर योगेश राईलाई ठगी गरेको आरोपमा प्रहरीले शुक्रबार पक्राउ गरी शनिबार सार्वजनिक गरेको छ ।
उनीमाथि रोजगारीका लागि बेलायत पठाइदिने भन्दै ३४ लाख २३ हजार तीन सय रुपैयाँ ठगी गरेको आरोप छ ।
जिल्ला प्रहरी परिसर काठमाडौंका प्रवक्ता एवम् प्रहरी उपरीक्षक नवराज अधिकारीका अनुसार राईले रोहित श्रेष्ठ र जिवेन्द्र श्रेष्ठलाई बेलायत पठाइदिने भन्दै ३४ लाख २३ हजार तीन सय रुपैयाँ ठगी गरेका हुन् ।
हाल उनीमाथि प्रहरीले अनुसन्धान गरिरहेकाे छ ।
पछिल्लो समय ‘इमान्दार भनिने’ भूतपूर्व ब्रिटिश गोर्खा आर्मीहरु रोजगारीका लागि बेलायत पठाइदिने भन्दै ठगी आरोपमा पक्राउ पर्न थालेका छन् ।
आर्थिक हिसाबले सम्पन्न मानिने भूतपूर्व ब्रिटिश सैनिकहरुले बेलायत पठाइदिन मोटो रकम लिने तर उनीहरुलाई बेलायत नपठाएर ठगी गरेको समाचार यसअघि पनि आएकाे थियाे ।
पक्राउ परेका राई बेलायतमा रहेकाे नेपाली सुनचाँदी व्यवसायीहरुकाे संगठनकाे पनि अध्यक्ष हुन् ।
