उज्यालो नेपाल पार्टीले आगामी मंसिर १७ गते काठमाडौंको प्रज्ञा भवन, कमलादीमा आफ्नो औपचारिक घोषणा गर्ने भएको छ।
शुक्रबार काठमाडौंमा आयोजित पत्रकार सम्मेलनमार्फत पार्टीले दिउँसो १ बजेदेखि ४ बजेसम्म घोषणा कार्यक्रम तय भएको जानकारी दिएको हो।
पार्टीका अनुसार सो दिन दीर्घकालीन दृष्टि, मूल ध्येय तथा विस्तृत घोषणापत्र–२०८२ सार्वजनिक हुनेछ, जसमा पार्टीको सैद्धान्तिक मार्गदर्शन, प्राथमिकता र कार्ययोजनाहरू स्पष्ट रूपमा समेटिनेछन्।
पार्टीले नेपालका संवैधानिक उपलब्धिलाई आत्मसात् गर्दै प्रतिस्पर्धात्मक बहुदलीय लोकतन्त्र, नागरिक स्वतन्त्रता, मौलिक अधिकार, मानव अधिकार, निष्पक्ष न्यायपालिका, प्रेस स्वतन्त्रता र कानूनी शासनलाई आफ्नो राजनीतिक आधार मान्ने जनाएको छ।
त्यसैगरी प्रभावकारी सेवा प्रवाह र सामाजिक-आर्थिक रुपान्तरण मार्फत समृद्ध राष्ट्र निर्माण प्रमुख लक्ष्य रहनेछ।
