विश्व स्वास्थ्य संगठन (डब्लुएचओ)ले युराेपका देशहरुमा काेराेनाभाइरसकाे अर्काे चरणकाे महामारी सुरु हुनसक्ने जनाएकाे छ ।
युरोपेली देशहरुमा फेरि कोरोनाभाइरस संक्रमितहरुकाे संख्या बढ्न थालेपछि डब्लुएचओले अर्काे चरणकाे महामारी सुरु हुनसक्ने भन्दै चिन्ता व्यक्त गरेकाे हाे ।
डब्लुएचओले बिहीबार करिब दुई महिनापछि संक्रमितहरुकाे संख्या बृद्धि भएको जानकारी गराउँदै महामारी फैलिन नदिने उपायहरुप्रति बेवास्ता गरेमा फेरि महामारी फैलिने खतरा रहेकाले त्यसतर्फ सवै तत्काल सतर्क हुनुपर्ने जनाएकाे छ ।
‘युरोपेली क्षेत्रमा महामारीको अर्को चरण सुरु हुनसक्ने खतरा देखिएको छ, त्यसैले महामारी नियन्त्रण गर्न अपनाउनु पर्ने उपायहरुप्रति सबै सतर्क हुनुपर्दछ,” संगठनको युरोप क्षेत्रीय कार्यालयका निर्देशक हान्स क्लुगले भनेका छन् ।
उनले पत्रकार सम्मेलनमा दिएको जानकारी अनुसार युरोपेली क्षेत्रमा अहिले १० प्रतिशतको दरले संक्रमितकाे संख्यामा बृद्धि भएको हो ।
उनले युरोपेली देशहरुमा सामाजिक दूरी कायम राख्ने, मास्क लगाउने र साबुनपानी वा सेनिटाइजरको प्रयोग गर्ने कार्यलाई कडाइका साथ गर्न गराउन पनि आग्रह गरे ।
नयाँ चरणको महामारीमा डेल्टा भेरियन्ट फैलिने भएकाले यसले थप क्षति हुने सम्भावना बढिरहेको उनले बताए ।
उनले खोप लगाउने अभियानलाई पनि उच्च प्राथमिकताका साथ अगाडि बढाउन पनि सबै देशका अधिकारीलाई आग्रह गरे ।
उनले भने, ‘खोपले डेल्टा भेरियन्टको कोरोनाभाइरसबाट बचाएको देखिएको छ, त्यसका लागि दुई मात्रा खोप लगाउनु अति राम्रो हुन्छ ।’
