काठमाडाैं । अख्तियार दुरुपयोग अनुसन्धान आयोगले राष्ट्रिय भूमि आयोगका अधिकृत गणेशप्रसाद पोखरेलविरुद्ध १ कराेड ६ लाख रुपैयाँ भन्दा बढी रकम भ्रष्टाचार गरेकाे भन्दै शुक्रबार विशेष अदालत काठमाडौंमा मुद्दा दायर गरेकाे छ ।
आयोगका प्रवक्ता श्यामप्रसाद भण्डारीले १ करोड छ लाख ३३ हजार ३३९ रुपैयाँ बिगो कायम गरेर पाेखरेलविरुद्ध विशेष अदालत काठमाडाैंमा मुद्दा दायर गरिएकाे जानकारी दिए ।
पाेखरेल यातायात व्यवस्था कार्यालय सवारी चालक अनुमतिपत्र सुकेधाराका तत्कालीन निमित्त कार्यालय प्रमुख रहँदा नै अख्तियारले उनीमाथि अनुसन्धान थालेकाे थियाे ।
हाल उनी सरुवा भएर राष्ट्रिय भूमि आयोग ताहाचल काठमाडाैंमा कार्यरत थिए । पाेखरेल २०४६ साल असारदेखि सरकारी सेवा प्रवेश गरेका थिए ।
अख्तियारले २०४६ सालदेखि २०७८ फागुन १५ गतेकाे अवधिमा पाेखरेलकाे नाममा उनकाे परिवारकाे नाममा रहेकाे चलअचल सम्पत्तिकाे अनुसन्धान गरेकाे थियाे ।
अनुसन्धानमा ४ करोड ३७ लाख ८८ हजार ४०२ रुपैयाँ बराबरको सम्पत्ति फेला पारेकोमा ३ करोड ३१ लाख ५५ हजार ६२ रुपैयाँकाे मात्रै स्रोत खुलेको थियाे ।
स्रोत नखुलेको पैसालाई बिगो कायम गरी पोखरेलविरुद्ध मुद्दा दायर गरिएकाे हाे ।