प्रधानमन्त्री शेरबहादुर देउवाले प्रदेश १ को नाम ‘किरात’ राख्दैमा केही पनि नबिग्रने बताएका छन् ।
नेपाली कांग्रेसका सभापति समेत रहेका प्रधानमन्त्री देउवाले आज किरात राई यायोक्खाको टोलीसँग प्रदेश १ को नाम पहिचानकाे आधारमा राख्न कांग्रेस सकारात्मक रहेको बताए ।
उनले किरात नेपालको प्राचीन सभ्यता भएको र काठमाडौं उपत्यकामा लामो समय किरातहरुले शासन सञ्चालन गरेको सबैलाई थाहै भएको स्मरण पनि गरे ।
उनले भने, ‘किरात प्राचीन सभ्यता हो, पहिले काठमाडौं उपत्यकामा किरातहरुले लामो समय शासन सञ्चालन गरेको सबैलाई थाहा छ, नाम राख्दा के भयो र ?’
प्रधानमन्त्री देउवाले प्रदेश १ लाई किरात प्रदेश नाम राख्न आफ्ना साथीहरुलाई भन्ने विश्वास व्यक्त गर्दै भने, ‘प्रदेशको नामाङ्कनमा किरात उल्लेख गर्दा केही फरक पर्दैन, पहिचानको आधारमा नामाङ्कन गर्ने कुरामा कांग्रेस सकारात्मक छ, म साथीहरुलाई भन्छु ।’
यायोक्खाका अध्यक्ष दिवस राई नेतृत्वको टोलीले आज प्रधानमन्त्री निवास बालुवाटार पुगेर प्रधानमन्त्री देउवालाई किरात प्रदेश नाम राख्नका लागि ज्ञापनपत्र बुझाएकाे हाे ।
