निर्वाचन आयोगले आगामी मंसिर ४ गते हुने प्रतिनिधिसभा र प्रदेशसभा सदस्यको निर्वाचनमा उम्मेदवारहरुले गर्न सक्ने खर्चको सिलिङ (बजेट) तोकेको छ ।
आयोगले मतदाताको संख्या, मतदान केन्द्र र भौगोलिक क्षेत्रफलका आधारमा प्रत्यक्ष निर्वाचनमा लड्ने उम्मेदवारहरुले गर्न सक्ने खर्चको सीमा तोकेको हो ।
आयोगले विभिन्न जिल्ला तथा निर्वाचन क्षेत्रअनुसार प्रतिनिधिसभा प्रत्यक्ष उम्मेदवारले २५ देखि ३३ लाख रुपैयाँसम्म खर्च गर्न सक्ने सीमा तोकेको हो ।
उम्मेदवारहरुले मतदाता नामावली खरिद, सवारी साधन, सवारी इन्धन, प्रचारप्रसार सामग्री, ढुवानी, कार्यालय सञ्चालन लगायत दश शीर्षकमा खर्च गर्न पाउनेछन् ।
प्रदेशसभाको प्रत्यक्ष उम्मेदवारले भने निर्वाचन क्षेत्रअनुसार १५ देखि २३ लाख रुपैयाँसम्म खर्च गर्न पाउनेछन् ।
यसैगरी समानुपातिक उम्मेदवारको खर्च भने पार्टीले नै बुझाउनुपर्ने छ ।
समानुपातिकमा प्रतिनिधिसभा सदस्यका लागि एक उम्मेदवारका लागि बढीमा दुई लाख रुपैयाँ र प्रदेशसभा सदस्यका लागि १ लाख ५० हजार रुपैयाँ भन्दा बढी नहुने गरी खर्च गर्नुपर्ने छ ।
