काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देन उपप्रधानमन्त्रीसहित उर्जामन्त्री बन्ने भएका छन् ।
मंगलबार विस्तार हुने मन्त्रिपरिषद्मा राप्रपाबाट अध्यक्ष लिङ्देनसहित तीन जनाले मन्त्रीकाे शपथग्रहण लिने भएका हुन् ।
राप्रपाबाट विक्रम पाण्डे सहरी विकासमन्त्री र ध्रुवबहादुर प्रधान कानुनमन्त्री बन्दै छन् ।
पार्टी सरकारमा जाने निर्णयमा पुगेपछि अध्यक्ष लिङ्देनले खरो उत्रने घोषणा गरेका छन् ।
उनले पार्टीभित्र ठूलो पंक्तिको असहमतिको बिचमै ढिलो चाडो सरकारमा जानुपर्ने आफ्नाे अनिवार्य सर्त रहेको भन्दै अब खरो उत्रने ट्वीटरबाट बताएका हुन् ।
आफ्ना समर्थक तथा शुभेच्छुकहरूको ठूलो पङ्क्तिको असहमतिका बीच पनि यो अग्नि परीक्षामा होमिने निर्णयमा पुगेँ जो ढिलो या चाँडो मेरा लागि अनिवार्य थियो।
प्रिय जनहरू, असम्भव जस्तो लागे पनि म खरो उत्रनेछु !
धैर्यता र सहयोगका लागि अपिल गर्दछु !!— Rajendra Lingden (@RajendraLingden) January 17, 2023
