जनता समाजवादी पार्टीका वरिष्ठ नेता अशोक राईले हाल नेपाली जनताले सात दशक लामो संघर्ष गरेर प्राप्त गरेका महत्वपूर्ण उपलब्धिहरुमाथि प्रहार भइरहेको बताएका छन् ।
नेता राईले गणतन्त्र, संघीयता, धर्मनिरपेक्षता, समावेशिताजस्ता उपलब्धिहरुमाथि प्रहार गर्ने प्रतिगामीहरुविरुद्ध लाग्न कार्यकर्ताहरुलाई निर्देशन समेत दिएका छन् ।
जसपा प्रदेश नं १ समितिले आज जुम भिडियो मिटिङमा आयोजना गरेको प्रशिक्षण कार्यक्रममा नेता राईले जसपाको नारा प्राप्त उपलब्धिहरुको रक्षा गर्ने र बाँकी उपलब्धिका लागि संघर्ष गर्ने रहे पनि अहिले प्राप्त उपलब्धिहरुमाथि नै प्रहार भइरहेको बताए ।
उनले नेकपा एमालेका अध्यक्ष तथा प्रधानमन्त्री केपी ओली उपलब्धिहरुमाथि प्रहार गर्ने प्रतिगमनकारीहरुको प्रमुख पात्र बनेको बताए ।
प्रधानमन्त्री ओली गणतन्त्र, संघीयता, समावेशिता र धर्मनिरपेक्षताको विरोधी रहेको नेता राईको भनाइ छ ।
नेपालमा २०६२/६३ मा राजतन्त्रको विरुद्धमा तथा अग्रगमन र परिवर्तनको पक्षमा जनआन्दोलन चलिरहेको बेला ओली गणतन्त्रको विरुद्धमा रहेको नेता राईले स्मरण गराए ।
उनले नेपालमा एउटै संसदलाई दुईदुई पटक विघटन गर्नु गम्भीर विषय रहेको औंल्याए ।
उनले प्रधानमन्त्री ओलीको कदमविरुद्ध अहिले जसपासहितको पाँच दलीय गठबन्धनले राजनीतिक तथा कानुनी लडाईं लडिरहेको बताए ।
कार्यक्रममा जसपाका कार्यकारिणी सदस्य पर्शुराम खापुङले पार्टी अहिलेसम्म पनि जनताको बिचमा पुग्न नसकेको वास्तविकता औंल्याउँदै अब तीव्र गतिमा स्थानीय तहको वडा र टोलसम्म संगठन विस्तार गर्नुपर्ने बताए ।
उनले पार्टी संगठन बलियो हुँदा मात्र कुनै पनि निर्वाचनमा परिणाम ल्याउन सकिने बताए ।
जसपाकी कार्यकारिणी सदस्य दुर्गा सोबले पार्टीको विधान र नियमावली पढ्दा अन्य पार्टीहरुको भन्दा अग्रगामी र उत्कृष्ट भए पनि संगठन निर्माणको व्यवहारिक पाटोमा विधान कार्यान्वयन नभएको बताइन् ।
उनले महिलाहरुलाई ३३ प्रतिशत प्रतिनिधित्व गराउने तथा पार्टीभित्र समानुपातिक समावेशी प्रतिनिधित्व हुने विधान भए पनि व्यवहारमा कार्यान्वयन नभएको कार्यकर्ताहरुको गुनासो आइरहेको बताइन् ।
जसपाका कार्यकारिणी सदस्य युवराज कार्कीले समेत प्रशिक्षण दिएका थिए । जुम भिडियो कार्यक्रम जसपा प्रदेश नं १ का अध्यक्ष प्रविण चाम्लिङको अध्यक्षतामा भएको हो ।
अध्यक्ष चाम्लिङले प्रदेश नं १ ले तीनवटा प्रशिक्षण कार्यक्रम सञ्चालन गर्ने निर्णय गरेको र सो अनुसार आज दोस्रो प्रशिक्षण कार्यक्रम गरिएको बताए ।
तेस्रो प्रशिक्षण कार्यक्रम यही असार १४ गते गरिने उनले बताए ।
जसपा प्रदेश नं १ ले गत असार ९ गते पार्टीका संघीय परिषद् अध्यक्ष डा. बाबुराम भट्टराई, केन्द्रीय समिति अध्यक्ष उपेन्द्र यादव, कार्यकारिणी सदस्यहरु हेमराज राई, डम्बर खतिवडा र शुशीला श्रेष्ठलाई प्रशिक्षकको रुपमा सहभागी गराएर कार्यक्रम गरेको थियो ।