प्रधानमन्त्री शेरबहादुर देउवाले प्रतिनिधि सभाबाट विश्वासको मत प्राप्त गरेका छन् ।
प्रतिनिधि सभामा विश्वासको मतकाे प्रस्तावमा देउवाकाे पक्षमा १६५ मत परेकाे छ । विपक्षमा ८३ मत मात्रै परेको छ । १ मत तटस्थ रहेकाे छ ।
प्रतिनिधि सभामा २४९ जना सांसद उपस्थित थिए ।
नेपाली कांग्रेसका सभापतिसमेत रहेका देउवालाई कांग्रेस, माओवादी केन्द्र, जसपाका दुवै समूह र नेकपा एमालेका दुबै समूहका केही सांसदहरुले मत दिएका हुन् ।
सभामुख अग्निप्रसाद सापकोटाले प्रतिनिधि सभामा भएको मतदानपछि देउवाले बहुमत प्राप्त गरेको घोषणा गरेका छन् ।
एमालेका माधव नेपाल पक्षका केही सांसद तटस्थ बसेका थिए भने माधव नेपालसहित केही नेताले देउवालाई मत दिएका थिए ।
केपी ओली पक्षका सांसदहरु प्रेस आले र किसान श्रेष्ठ लगायतले पार्टीकाे निर्णयविपरीत देउवाको पक्षमा मतदान गरेका थिए ।
राजतन्त्र र हिन्दुराज्यकाे एजेन्डा बाेक्ने एक मात्र सांसद रहेकाे राप्रपा तटस्थ बनेकाे हाे । एक जना सांसद भएकाे राष्ट्रिय जनमोर्चाले देउवाको पक्षमा मतदान गरेकाे छ ।
नारायणमान बिजुक्छे नेतृत्वकाे नेमकिपाले भने विपक्षमा मतदान गरेको छ ।
प्रतिनिधि सभाबाट विश्वासको मत पाएसँगै देउवा सरकारकाे कार्यकाल १७ महिना निश्चित भएकाे छ ।
यसबीचमा देउवा नेतृत्वकाे सरकारमाथि काेराेना महामारीले तहस नहस पारेको अर्थतन्त्रलाई लयमा फर्काउने, सबै जनतालाई खोपको व्यवस्था गर्ने र स्थानीय, प्रदेश र संघ तीनवटै तहकाे निर्वाचन गराउने जिम्मेदारी परेकाे छ ।
यो मेरो पनि जीत हो