जनता समाजवादी पार्टीको महिला संगठन समाजवादी महिला महिला संघले पार्टीको हरेक तहको समिति तथा निकायहरुमा ३३ प्रतिशत महिलाको प्रतिनिधित्व सुनिश्चित गर्न पार्टीका नेताहरुसँग माग गरेको छ ।
शुक्रबार समाजवादी महिला संघका पदाधिकारी तथा महिला नेत्रीहरुको टोलीले पार्टीका वरिष्ठ नेता अशोक राईलाई भेटेर पार्टीको हरेक संरचनामा ३३ प्रतिशत महिलाको प्रतिनिधित्व गराउन ध्यानाकर्षण पत्र बुझाएका छन् ।
समाजवादी महिला संघकी अध्यक्ष निर्मला यादवले पार्टी सरकारमा सहभागी हुँदा पनि महिलाहरुको ३३ प्रतिशत प्रतिनिधित्व हुनुपर्ने बताइन् ।
‘हाम्रो पार्टी अहिले सरकारमा सामेल हुन लागेको छ । सरकारमा सामेल हुँदा पनि ३३ प्रतिशत महिलाको अधिकार सुनिश्चित हुनुपर्छ भन्ने हाम्रो माग छ,’ साल्पा अनलाइनसँग उनले भनिन्, ‘हाम्रो पार्टी अन्य पार्टीहरुभन्दा समावेशी पार्टी भनिरहेको बेला पार्टीको सबै तहको समिति र निकायहरुमा संविधान र हाम्रो पार्टीको विधानमा व्यवस्था गरिए अनुसार ३३ प्रतिशत महिलाहरुको प्रतिनिधित्व गराउन नेताहरुलाई ध्यानाकर्षण गराउन चाहेका हौं ।’
उनले पार्टीका अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराईलाई पनि भेटेर ध्यानाकर्षण गराइने बताइन् ।
जसपामा महिला सहभागिता
समाजवादी महिला संघकाे ध्यानाकर्षण पत्र अनुसार जसपाको ५१ सदस्यीय केन्द्रीय कार्यकारिणी समितिमा हाल सात जना मात्र महिला छन् ।
उक्त समितिमा ३३ प्रतिशत महिलाको प्रतिनिधित्व पुग्न ११ जना महिला हुनुपर्ने छ ।
तर हाल जसपाबाट महन्थ ठाकुर र राजेन्द्र महतो समूह अलग भएपछि कार्यकारिणी समितिको संख्या ३५ कायम भएको छ ।
यसैगरी जसपाको ८०० सदस्यीय केन्द्रीय समितिमा हाल ८३ जना मात्र महिला छन् । उक्त समितिमा ३३ प्रतिशत महिला पुग्नका लागि समितिमा २६४ जना महिला हुनुपर्ने थियो ।
महिला संघले अब निर्माण हुने पार्टी समिति वा विभागहरुमा पनि ३३ प्रतिशत महिला सहभागिता हुनुपर्ने माग राखेको छ ।
ध्यानाकर्षण गराउनै नपर्ने विषय
महिला नेतृहरुसँगको भेटमा जसपाका वरिष्ठ नेता राईले पार्टीको संरचनामा ३३ प्रतिशत महिला सहभागिताको विषय ध्यानाकर्षण गराउनै नपर्ने विषय रहेको बताए ।
उनले महिला नेतृहरुले उठाएको विषयलाई पार्टीले ध्यान दिएर पूरा गर्ने प्रतिवद्धता जनाए ।