जनता समाजवादी पार्टीले गण्डकी प्रदेशमा संगठन सुदृढीकरण तथा जनजागरण अभियान (सुज अभियान)लाई प्रभावकारी एवम् व्यवस्थित बनाउन ११ सदस्यीय सचिवालय गठन गरेकाे छ ।
आइतबार पाेखरामा आयाेजित गण्डकी प्रदेशमा रहेका केन्द्रीय सदस्यहरुकाे बैठकले कार्यकारिणी सदस्य हिसिला यमीकाे संयाेजकत्वमा सचिवालय गठन गरेकाे हाे ।
जसमा कार्यकारिणी सदस्य शिवलाल थापा मगर, प्रदेश इन्चार्ज गणेशमान गुरुङ, तमुवान राष्ट्रिय समितिका इन्चार्ज रुद्रबहादुर गुरुङ, केन्द्रीय सदस्यहरु मोती रिजाल, राजन केसी, नरमाया ढकाल, शम्भु खाती र देवबहादुर दुरा सदस्य छन् ।
सचिवालयमा मगरात राष्ट्रिय समितिबाट दुई जना सदस्य थपिने बैठककाे निर्णय छ ।
यसैगरी सुज अभियानकाे जिल्ला संयोजनका लागि कास्कीमा धनप्रसाद तामाङ, गाेरखामा ज्ञानेन्द्र कुमाल, नवलपुरमा मोती रिजाल, तनहुँमा शिवलाल थापा मगर, स्याङ्जामा नरमाया ढकाल, बाग्लुङमा यमबहादुर घर्ती, पर्वतमा देविराज गुरुङ, लमजुङ र मनाङमा राजु थापा, खेमजङ्ग गुरुङ र देवबहादुर दुरालाई जिम्मेवारी दिइएकाे छ ।
म्याग्दी र मुस्ताङमा भने सचिवालयले नै संयोजन गर्नेछ ।
जिल्लामा आगामी असोज ७ गतेभित्र संयोजन र १५ गतेभित्र अभिमुखीकरण कार्यक्रम गरिनेछ ।
