सामाजिक लोकतान्त्रिक पार्टीका उपाध्यक्ष मानबहादुर राई र संघीय लिम्बुवान पार्टीका सचिव गजेन्द्र आङ्बुहाङ राष्ट्रिय जनमुक्ति पार्टीमा प्रवेश गरेका छन् ।
उपाध्यक्ष राई र सचिव आङ्बुहाङ शुक्रबार प्रदेश नं १ को धरानमा आयोजित राष्ट्रिय जनमुक्तिको १२औं संघीय परिषद्को बैठकमै पार्टी प्रवेश गरेका हुन् ।
जनमुक्तिको सचिव बलदीप प्रभाश्वर चाम्लिङले राई र आङ्बुहाङ आफूहरुको पार्टीमा प्रवेश गरेको सामाजिक सञ्जालबाट जानकारी दिएका हुन् ।
आदिवासीवादलाई राजनीतिक दर्शन बनाउनुपर्ने बताउँदै आएका राई केही समयअघि मात्रै सामाजिक लोकतान्त्रिक पार्टीमा प्रवेश गरेका थिए । सोअघि उनी किरात पार्टीका नेता थिए ।
राई र आङ्बुहाङसँगै सामाजिक लोकतान्त्रिक पार्टीका सदस्य राजेश खिम्दुङ र दलित श्रमिक मोर्चाका पूर्वमहासचिव रविन्द्र सुनार पनि राष्ट्रिय जनमुक्तिमा प्रवेश गरेको नेता चाम्लिङले जनाएका छन् ।
