राजनीतिक विश्लेषक प्रा.डा. युवराज संग्रौलाले अमेरिकाले व्याख्यात्मक घोषणासहितको एमसीसी स्वीकार गरेको भनेर जनतालाई नढाड्न नेताहरुलाई आग्रह गरेका छन् ।
उनले केही नेताहरुले अमेरिकाले व्याख्यात्मक घोषणासहितको एमसीसी स्वीकार गरेको भनी प्रचार गरेको भन्दै जनतामाथि छलकपट नगर्न आग्रह गरेका छन् ।
नेपालले व्याख्यात्मक घोषणासहितको एमसीसी संसदबाट पास गरेको विषयलाई अमेरिकाले ‘जानकारीमा लिइयो’ मात्रै भनेको संग्रौलाले बताए ।
‘हल्ला त व्याख्यात्मक घोषणा एमसीसी अमेरिकाले स्वीकार गर्यो भनेर केही नेताले नै गरेछन् । लेखिएको के रहेछ भने ‘नेपालको संघीय संसदले अमेरिकी मिलेनियम च्यालेन्ज कर्पोरेशनको ५०० मिलियन डलरको सम्झौता पारित गरेको कुरा जानकारीमा लिइयो’ । नेपालका तीन वामपन्थी पार्टीले खुलेर हामीले एमसीसीको सम्झौता मान्यौं भने हुन्छ नि, छलकपट किन ?,‘ उनले फेसबुकमा लेखेका छन्, ‘व्याख्यात्मक घोषणालाई अमेरिकाले स्वीकार गर्यो भनेर जनतालाई किन छल्नु ? एकनलेज भनेको जानकारी भयो भनेको हो ।’
उनले अमेरिकाले जारी गरेको प्रेस रिलिज समेत राख्दै उक्त अंग्रेजीमा लेखिएको कुरा राम्ररी पढ्न अनुरोध गरेका छन् ।
