नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले नेपालको प्रथम सहिद लखन थापामगर नभएको हिजो काठमाडौंको एक कार्यक्रममा बताए । उनले प्रथम सहिद बाकावीर रहेको जिकिर गरे ।
‘नेपालको प्रथम सहिद लखन थापा’ भनेर चिनिदै आएको भए पनि अध्यक्ष ओलीले लखन थापा पहिलो सहिद नभएको बताए ।
मगर समुदायको साझा संस्था नेपाल मगर संघले हिजै एक प्रेस विज्ञप्ति जारी गरी ‘नेपालको प्रथम सहिद लखन थापा होइनन्, बाकावीर हुन्’ भन्ने ओलीको अभिव्यक्तिप्रति गम्भीर ध्यानाकर्षण भएको जनायो ।
संघका महासचिव ज्ञानेन्द्र पुनमगरले ओलीको नाम उल्लेख नगरीकनै विज्ञप्ति निकाले । उनले अभिव्यक्ति स्वतन्त्रताको नाममा गलत र भ्रामक कुरा गर्ने छुट कसैलाई नभएको भन्दै चेतावनी पनि दिए ।
‘आम नेपाली जनताको मुक्ति र न्यायको पक्षमा तत्कालीन जहानियाँ राणा शासनको विरुद्धमा नेपालमा पहिलोपटक संगठित विद्रोह गर्ने क्रममा १९३३ फागुन २ गते तत्कालीन शासकहरुबाट हत्या गरिएको नेपालको प्रथम सहिद लखन थापामगरको बारेमा बिना तथ्य प्रमाण केही नेताहरु र विद्वानहरुले भ्रामात्मक कुरा गरेकोप्रति नेपाल मगर संघ केन्द्रीय समितिको गम्भीर ध्यानाकर्षण भएको छ,’ विज्ञप्तिमा उल्लेख छ, ‘तत्कालीन संस्कृतिमन्त्री कृपाशुर शेर्पाले पेश गरेको प्रस्तावलाई तत्कालीन प्रधानमन्त्री सुशील कोइरालाको मन्त्रिपरिषद्ले २०७२ असोज ३ गतेका दिन गरेको निणर्यको विरुद्धमा बोल्ने वा बहस गर्ने अख्तियारी कसैलाई नहुँदानहुँदै पनि राजनैतिक भाषणको लहदमा यसरी बारम्बार भ्रामक कुरा आउनु सबै सहिदमाथिको गम्भीर अपमान हो । लखन थापामगर लगायतका सहिदहरुको बलिदानीपूणर् योगदानका कारण नेपाल अहिले संघीय लोकतान्त्रिक गणतन्त्रात्मक शासन व्यवस्थामा परिणत भएकै कारण अहिले अभिव्यक्ति स्वतन्त्रता छ । स्वतन्त्रताको नाममा गलत र झुट कुरा गर्ने छुट जोकसैलाई छैन ।’
संघले प्रथम सहिद लखन थापा मगर भनेर सामान्यज्ञानमा समेत स्थापित भइसकेको उल्लेख गर्दै मगर समुदायमाथि आँच आउने खालको गलत र भ्रामक कुरा नगर्न चेतावनी समेत दिएको छ ।
भाषणबाट गलत र भ्रम फैलाइएको भनिए पनि विज्ञप्तिमा भाषण गर्ने नेता ओलीको नाम लेखिएको छैन । किनकि, संघका महासचिव पुन र अध्यक्ष नविन रोका मगर नेकपा एमालेकै कार्यकर्ता हुन् ।
यसअघि पनि अध्यक्ष ओलीले कोसी नदीमा रहेको किरात राईहरुको सांस्कृतिक महत्वको खुवालुङलाई फुटाएर जेटबोट चलाउने भनी भाषण दिएका थिए ।
त्यसबेला त राईहरुको संस्था किरात राई यायोक्खाले औपचारिक रुपमा विज्ञप्ति निकालेर विरोध जनाउनेसम्मकाे हिम्मत पनि गरेन । किनकि, यायोक्खाकाे नेतृत्वमा पनि एमाले निकटकै व्यक्तिहरु थिए ।
पछिल्लो समय सामाजिक सांस्कृतिक संस्थाहरुमा चरम् दलीय राजनीति हाबी हुँदै गएपछि ती संस्थाहरुको औचित्यमाथि नै प्रश्न उठ्न थालेको छ ।
