धरान उपमहानगरपालिका-२०, सर्दुखोला किनारमा नगरपालिकाकाे बजेटबिनै धरानका स्वतन्त्र दिदीबहिनीहरुले रोज गार्डेन निर्माण गरेका छन् ।
बुधबार धरानका मेयर हर्क साम्पाङ (हर्कराज राई)ले ३० लाख ४४ हजारमा निर्माण गरिएकाे रोज गार्डेनको उद्घाटन गरे ।
गार्डेनमा थुन्से बोकेकी दिदी र झोला बोकेकी बहिनीको प्रतिमा पनि निर्माण गरिएको छ । उक्त प्रतिमाको पनि अनावरण गरिएको छ ।
मेयर साम्पाङले रोज गार्डेन बनाउनका लागि स्वतन्त्र दिदीबहिनीहरुकाे समूह गठन गरेका थिए ।
मेयर साम्पाङको परिकल्पना अनुसार ५९ औं दिनमै रोज गार्डेन यथार्थमा परिणत भयो । त्यसका लागि मेयर साम्पाङले स्वतन्त्र दिदीबहिनीहरुले शतप्रतिशत अंक ल्याएको बताए ।
रोज गार्डेन निर्माणका लागि देश-बिदेशबाट २६ लाख ३० हजार रुपैयाँ संकलन गरिएको थियो ।
स्वतन्त्र दिदीबहिनी समूहमा आबद्ध दिदीबहिनीहरु आफैले पनि ४ लाख ४५ हजार संकलन गरेका थिए ।
रोज गार्डेन निर्माणकाे क्रममा ३० लाख ४४ हजार रुपैयाँ खर्च भएको निर्माण समितिकी कोषाध्यक्ष विष्णु लिम्बुले बताइन् ।
बचत भएको ७५ हजार रुपैयाँ पनि सुम्निमा-पारुहाङ प्रतिमा निर्माणका लागि संयाेजक दत्तकुमार लिम्बुलाई हस्तान्तरण गरिएको थियो ।
गार्डेनको नाम ‘एसडिबी रोज गार्डेन’ राखिएको छ । एसडिबी रोज गार्डेन उद्घाटन कार्यक्रममा उपमेयर अइन्द्रविक्रम बेघा पनि उपस्थित थिए ।
रोज गार्डेनभित्र एक सेल्फी रोज निर्माण गरिएको थियो । जसको अनावरण भने उपमेयर बेघाले गरे ।
रोज गार्डेन परिसरमा वाटर फाउन्टेन र त्यसमा तीनचुलाकाे संरचना पनि निर्माण गरिएको छ ।
बुधबार प्रेम दिवसकाे सन्दर्भ पारेर एसडिबी रोज गार्डेनको उद्घाटन गरिएको हो ।
जसमा मेयर साम्पाङकी श्रीमती निर्मला लिम्बु विशेष रुपमा उपस्थित भइन् ।
सो क्रममा मेयर साम्पाङले महिलाहरु अब चुलाचौकामा सीमित हुन नहुने बताए । उनले महिलाहरु पुरुष भन्दा सक्षम, सुन्दर र इमान्दार हुने भन्दै उनीहरुले देशकै नेतृत्व गर्नुपर्ने बताए ।