मुन्दुम ट्रेलमा यात्रा गर्ने पर्यटकहरुको सुरक्षा व्यवस्थालाई ध्यानमा राखेर जिल्ला प्रहरी कार्यालय खोटाङले ११३ किलोमिटर दुरीको गस्ती गरेको छ ।
ऐसेलुखर्क गाउँपालिका–२ बाकाचोल देउरालीबाट सुरु गरिएको प्रहरीको गस्ती साकेला गाउँपालिका–१ बाँझेमा पुगेर समापन गरिएको हो ।
मुन्दुम ट्रेलमा प्रहरीको उपस्थिति देखाउँदै मुन्दुम ट्रेलमा यात्रा गर्ने पर्यटकहरुको सुरक्षाका लागि भावी रणनीति निर्माण गर्न गस्ती गरिएको जिल्ला प्रहरी कार्यालय खोटाङका डिएसपी पुरुषोत्तम खड्काले बताए ।
खोटाङ, भोजपुर, संखुवासभा र सोलुखुम्बु जोडिएको मुन्दुम ट्रेलमा एक लाख पर्यटक भित्राउने लक्ष्यसहित २०२५ मा मुन्दुम ट्रेल भ्रमण वर्ष मनाउने तयारी छ ।
मैयुङ टेम्के साल्पा सिलिचुङ पर्यटन प्रवद्र्धन केन्द्रले गत जुनमा काठमाडौंमा पत्रकार सम्मेलन गरी २०२५ लाई मुन्दुम ट्रेल भ्रमण वर्ष मनाउने जानकारी गराएको थियो ।
