नेपाल मगर संघले संघीयता, धर्मनिरपेक्षता, गणतन्त्र, समावेशिताजस्ता महत्वपूर्ण उपलब्धिहरुलाई परिवर्तन नचाहने एकात्मकवादी केन्द्रिकृत सोच भएकाहरुले उल्टाउन खोजिरहेको भन्दै सोप्रति गम्भीर ध्यानाकर्षण भएको जनाएको छ ।
संघका महासचिव टेक बहादुर नामजालीमगरले बुधबार एक प्रेस विज्ञप्ति जारी गरी नेपालको संविधान २०७२ मा आफूहरुको आंशिक सहमति रहेको र संविधानमा भएका उपलब्धिहरुलाई समेत पछिल्लो समय उल्टाउन खोजिएको उल्लेख गरेका छन् ।
पहिचान र सामथ्र्यका आधारमा संघीयता निर्माण नभए पनि धर्मनिरपेक्षता, संघीयता, गणतन्त्रजस्ता महत्वपूर्ण उपलब्धिहरुलाई जोगाउनुपर्ने संघले जनाएको छ ।
‘संघीयता, धर्मनिरपेक्षता, गणतन्त्र, समावेशी जस्ता महत्वपूर्ण उपलब्धिहरुलाई एकात्मकवादी, एकल धर्मवादी, केन्द्रिकृत सोच भएका, र परिवर्तन नचाहने सम्भ्रान्त र शासक वर्गहरुले र सुन्दर देश नेपालको प्रगति, धार्मिक/जातीय सद्भाव, प्रकृति नियमको विज्ञान अनुरुप सहअस्तित्व र सहकार्य विपरीत नस्लवादी, अहंकार, नाजीवादी सोचले देशमा स्थायित्व भएको नचाहने केही देशी–विदेशी शक्तिहरुले सारा उपलब्धिहरु उल्टाउने गरी चलखेल भइरहेको छ, त्यसप्रति नेपाल मगर संघको गम्भीर ध्यानाकर्षण भएको छ,’ विज्ञप्तिमा लेखिएको छ ।
समानुपातिक समावेशिता र पहिचानसहितको संघीयता निर्माण नभए पनि हालसम्मका प्राप्त उपलब्धिहरुलाई उल्टाउने षडयन्त्र र चलखेल गरिए सिंगो मगर समुदाय आन्दोलित हुने विज्ञप्तिमार्फत जनाइएको छ ।