खोटाङ । खाेटाङस्थित दिक्तेल रुपाकोट मझुवागढी नगरपालिकाका प्रमुख तीर्थराज भट्टराईले जापानको तोचिगी नगरप्रमुख ओकावा हिदेकोलाई किरात समुदायको संस्कृति र पहिचानसँग जोडिएको वाबु (चिन्डो) उपहार दिएका छन् ।
जापान भ्रमणमा रहेका प्रमुख भट्टराईले हिदेकोलाई वाबुका साथै चोयाबाट बुनेको भुने, थुन्से, बुद्धको मुर्ति, माछापुच्छ्रे हिमालको तस्बिर, दुई देशको झन्डाअंकित सामग्रीलगायतका उपहार दिएका हुन् ।
हिदेकोले भने भट्टराईलाई त्यहाँको उच्च सम्मानअनुसार प्रदान गरिने अंगुरबाट बनेको प्लेट र स्थानीय पङ्खा उपहार दिएकी छन् ।
नगरप्रमुख भट्टराई शिक्षा, स्वास्थ्य, फोहोर व्यवस्थापन, कृषिलगायत विषयमा अध्ययन गर्नका लागि १५ दिने औपचारिक भ्रमणमा गत माघ १ गते जापान पुगेका हुन् ।
भट्टराई र हिदेकोबिच २६ जनवरी २०२३ मा औपचारिक भेटवार्ता भएको थियाे ।
सो क्रममा दुवैले एक अर्कालाई आ–आफ्नाे देशको मौलिक कला-संस्कृति झल्काउने सामग्रीहरु उपहारस्वरुप आदान–प्रदान गरेका हुन् ।
पत्रकार सन्तोष घिमिरेका अनुसार भेटवार्तामा प्रमुख भट्टराईले आफ्नाे नगरपालिकाको औपचारिक भ्रमण गर्नका लागि हिदेकोलाई निमन्त्रणा समेत गरेका छन् ।
